ന്യൂയോര്‍ക്ക് നഗരത്തില്‍ പാഞ്ഞു വന്ന കാറിടിച്ച് ഒരാള്‍ മരിച്ചു,ഇരുപതിലധികം പേര്‍ക്ക് പരിക്ക്

ന്യൂയോര്‍ക്ക് നഗരത്തിലെ ടൈംസ് സ്‌ക്വയറില്‍ അതിവേഗത്തില്‍ വന്ന കാറിടിച്ച് ഒരാള്‍ തല്‍ക്ഷണം മരിച്ചു.ഇരുപതിലധികം പേര്‍ക്ക് പരിക്കേറ്റതായി റിപ്പോര്‍ട്ടുണ്ട്.യുഎസ് നേവിയില്‍ നിന്ന് വിരമിച്ച ക്രിമിനല്‍ പശ്ചാത്തലമുള്ള ഒരാളാണ് ജനങ്ങളുടെ ഇടയിലേക്ക് കാര്‍ ഓടിച്ചു കയറ്റി അപകടമുണ്ടാക്കിയത്. അടുത്ത കാലത്ത് ലണ്ടനില്‍ പാര്‍ലമെന്റ് സമുച്ചയത്തിനു സമീപമുണ്ടായ അപകടത്തിന് സമാനമായ രീതിയിലാണ് അമേരിക്കയിലെ ഏറ്റവും തിരക്കുള്ള നഗരത്തില്‍ അപകടമുണ്ടാക്കിയത്.അതുകൊണ്ടു തന്നെ പൊലീസും ജനങ്ങളും ആദ്യം അമ്പരന്നു.എന്നാല്‍ ഏതെങ്കിലും തരത്തിലുള്ള ഭീകരാക്രമണ പദ്ധതിയുമായി ഈ സംഭവത്തിന് ബന്ധമില്ലെന്ന് പൊലീസ് അറിയിച്ചു.

അമേരിക്കയിലെ ഏറ്റവും തിരക്കുള്ള നഗരമെന്ന ഖ്യാതി കൂടാതെ ഏറ്റവുമധികം വിനോദസഞ്ചാരികള്‍ എത്തുന്ന നഗരം കൂടിയാണ് ന്യൂയോര്‍ക്ക്.യു എസ് വാണിജ്യ തലസ്ഥാനമായ ന്യൂയോര്‍ക്കില്‍ മുഴുവന്‍ സമയവും പൊലീസ് സുരക്ഷ ഒരുക്കുന്നതാണ്.ഈ സുരക്ഷാ സംവിധാനങ്ങളെയെല്ലാം മറികടന്നാണ് അക്രമി അപകടമുണ്ടാക്കിയിരിക്കുന്നത്.

സംഭവത്തില്‍ 26 കാരനായ കാര്‍ ഡ്രൈവറെ കസ്റ്റഡിയിലെടുത്തിട്ടുണ്ട്.ഇയാള്‍ മയക്കുമരുന്നിന് അടിമയാണെന്ന് പൊലീസ് അറിയിച്ചു.