ജയലളിതയുടെ കാവല്‍ക്കാരനെ കൊല്ലപ്പെടുത്തിയ പ്രതികള്‍ക്ക്‌ അപകടം

ജയലളിതയുടെ കോടനാട്ടെ എസ്‌റ്റേറ്റില്‍ കാവല്‍ക്കാരനെ കൊലപ്പെടുത്തിയ സംഭവത്തില്‍ ദുരൂഹതയേറുന്നു. നേപ്പാള്‍ സ്വദേശിയായ എസ്‌റ്റേറ്റ് വാച്ച്മാന്‍ ഓം ബഹാദൂറിനെ കൊലപ്പെടുത്തിയ മുഖ്യപ്രതിയെന്ന് സംശയിക്കുന്ന കനകരാജ്, രണ്ടാം പ്രതി കെ.വി സയന്‍ എന്നിവര്‍ മണിക്കൂറുകളുടെ വ്യത്യാസത്തില്‍ അപകടത്തില്‍പ്പെട്ടു. കനകരാജ് സേലത്ത് വച്ചാണ് അപകടത്തില്‍പ്പെട്ടത്. രണ്ടാം പ്രതി സയന്‍ പാലക്കാട് കണ്ണാടിയില്‍ വച്ച് ഇന്ന് പുലര്‍ച്ചെ 5.50നാണ് അപകടത്തില്‍പ്പെട്ടത്. ഇയാളുടെ ഭാര്യ വിനുപ്രിയ (30), മകള്‍ നീതു (5) എന്നിവര്‍ മരിച്ചു.

കൊലപാതകവും തുടര്‍ന്ന് നടന്ന അപടകങ്ങളും ദുരൂഹത വര്‍ദ്ധിപ്പിച്ചിരിക്കുകയാണ്. അപടകത്തില്‍ ഗുരുതരമായി പരുക്കേറ്റ സയന്‍ തമിഴ്‌നാട് പോലീസിന്റെ കസ്റ്റഡിയിലാണ്. ഇയാളുടെ ഭാര്യയും മകളും അപകടത്തിന് മുമ്പേ കൊല്ലപ്പെട്ടിരുന്നതായി പോലീസ് സംശയിക്കുന്നു. ഇരുവരുടെയും കഴുത്തില്‍ ഒരേപോലുള്ള മുറിവുകള്‍ കണ്ടെത്തിയതാണ് സംശയത്തിനിടയാക്കിയത്. സയന്‍ ഉള്‍പ്പെട്ട അപകടം ബോധപൂര്‍വമാണെന്നാണ് പോലീസ് കരുതുന്നത്. റോഡരുകില്‍ നിര്‍ത്തിയിട്ടിരുന്ന ലോറിയിലേക്ക് കാര്‍ ഇടിക്കുകയായിരുന്നു. ഇയാള്‍ ബോധപൂര്‍വം കാറിടിപ്പിച്ചെന്നാണ് പോലീസ് നിഗമനം. അതേസമയം ജയലളിതയുടെയും ശശികലയുടെയും സ്വത്ത് സംബന്ധിച്ച് നിര്‍ണ്ണായക രേഖകള്‍ എസ്‌റ്റേറ്റില്‍ നിന്നും നഷ്ടപ്പെട്ടതായാണ് സൂചന.