സമരപ്പന്തലിൽ നാടകീയരംഗങ്ങൾ ; സമരക്കാരെ പൊലീസ് അറസ്റ്റ് ചെയ്തു നീക്കി

മൂന്നാറിൽ സമരം ചെയ്തു വന്ന പെമ്പിളൈ ഒരുമൈ പ്രവർത്തകരെ പൊലീസ് ബലം പ്രയോഗിച്ച് അറസ്റ്റ് ചെയ്തു നീക്കി. അഞ്ചു ദിവസമായി നിരാഹാരം അനുഷ്ഠിച്ചിരുന്ന ഗോമതിയേയും, കൗസല്യയേയുമാണ് പൊലീസ് അറസ്റ്റ് ചെയ്ത് നീക്കിയത്. ആരോഗ്യനില മോശമായ ഇവരെ അടിമാലിയിലെ ആശുപത്രിയിലേക്ക് മാറ്റുമെന്നാണ് വിവരം. സംഘർഷാവസ്ഥയിലാണ് മൂന്നാറിപ്പോൾ.

സമരപന്തലില്‍ ഉണ്ടായിരുന്ന പെമ്പിളൈ ഒരുമ പ്രവര്‍ത്തകരേയും ആം ആദ്മി പ്രവര്‍ത്തകരുടേയും എതിര്‍പ്പിനെ മറികടന്നായിരുന്നു അറസ്റ്റ്. കൗസല്യയേയും ഗോമതിയേയും ബലം പ്രയോഗിച്ചാണ് പൊലീസ് വാഹനത്തില്‍ കയറ്റിയത്. അറസ്റ്റ് ചെയ്തതിന് പിന്നാലെ പൊലീസ് വാഹനത്തില്‍ നിന്നും ഗോമതി ചാടാന്‍ ശ്രമിച്ചു. മണിയെ വിടില്ലെന്നായിരുന്നു ഗോമതി വിളിച്ചു പറഞ്ഞത്. ആം ആദ്മി നേതാക്കളും പെമ്പിളൈ ഒരുമ എക്‌സിക്യൂട്ടീവ് അംഗവും സമര പന്തലില്‍ സമരം തുടരുകയാണ്.