ന്യൂ ജനറേഷന്‍ ഡിസയറുമായി മാരുതി !

2017 ൽ വിപണി ഏറെ പ്രതീക്ഷയോടെ ഉറ്റുനോക്കിയിരുന്ന ന്യൂ ജനറേഷന്‍ സ്വിഫ്റ്റ് ഡിസയറിനെ മാരുതി അവതരിപ്പിച്ചു. മെയ് 16 നാണ് ഈ പുതിയ ഡിസയർ വിപണിയിലെത്തുകയെന്നാണ് കമ്പനി വൃത്തങ്ങള്‍ നല്‍കുന്ന സൂചന. പുതിയ മാരുതി ഡിസയറിന്റെ പെട്രോള്‍ വേരിയന്റ് 5.40 ലക്ഷം രൂപ മുതലും ഡീസല്‍ വേരിയന്റ് 6.20 ലക്ഷം രൂപ മുതലുമായിരിക്കും ആരംഭിക്കുകയെന്നാണ് പ്രതീക്ഷിക്കപ്പെടുന്നത്.

മാരുതിയുടെ ഏറ്റവും പുതിയ ലൈറ്റ് വെയ്റ്റ് പ്ലാറ്റ്ഫോമിലാണ് പുതിയ ഡിസയറിന്റെ നിർമാണം. ഡേ ടൈം റണ്ണിങ് ലാമ്പുകൾ, ക്രോംഫിനിഷോടു കൂടിയ ഹെക്സഗണൽ ഗ്രിൽ, എല്‍ഇഡി ഹെഡ്‌‌ലൈറ്റ്, പുതിയ എൽഇഡി ടെയിൽ ലാമ്പ്, സ്പോർ‌ട്ടിയായ അലോയ് വീലുകൾ എന്നിവയാണ് ഈ സെഡാന്റെ എക്സ്റ്റീരിയര്‍ സവിശേഷതകള്‍. ഈ ശ്രേണിയിലെ മറ്റുകാറുകളോട് മത്സരിക്കുന്നതിനായി ഇന്റീരിയറും കൂടുതൽ പ്രീമിയമാക്കിയിട്ടുണ്ട്.

ഡ്യുവൽ ടോണ്‍ ഡാഷ്ബോർഡാണ് പ്രധാനപ്രത്യേകത. ബെയ്ജ് അപ്ഹോൾസ്റ്ററിയും തടിയിൽ തീർത്ത ഉൾ‌ഭാഗങ്ങളും കാറിനകത്ത് നല്‍കിയിട്ടുണ്ട്. ഡൈവ്രർക്ക് എളുപ്പത്തിൽ കയറാനുമിറങ്ങാനും സഹായിക്കുന്ന ഫ്ലാറ്റ് ബോട്ടം, പുതിയ ട്വിൻപോഡ് ഇൻസ്ട്രുമെന്റ് കൺസോൺ, ആൻഡ്രോയിഡ് കാർപ്ലേയോടു കൂടിയ ടച്ച്‍സ്ക്രീൻ ഇൻഫോടെയിൻമെന്റ് സിസ്റ്റം എന്നീ നൂതന സംവിധാനങ്ങളും ഈ വാഹനത്തിലുണ്ട്.

1.2 ലിറ്റർ കെ–സീരീസ് പെട്രോൾ, 1.3 ലിറ്റർ ഡിഡിഐസ് ഡീസൽ എൻജിനുകളാണ് ഈ വാഹനത്തിന് കരുത്തേകുന്നത്. രണ്ട് വേരിയന്റുകളിലും അഞ്ച് സ്പീഡ് ഗിയര്‍ബോക്സാണ് ഉള്‍പ്പെടുത്തിയിരിക്കുന്നത്. സുരക്ഷയ്ക്കായി മുമ്പിൽ രണ്ട് എയർബാഗുകൾ, എബിഎസ് എന്നിവയും നല്‍കിയിട്ടുണ്ട്. ടാറ്റ ടിഗോർ, ഫോർഡ് ഫിഗോ, ഹ്യുണ്ടായ് എക്സെന്റ്, വോക്സ്‍വാഗൺ അമിയോ, ഹോണ്ട അമേയ്സ് എന്നിവയായിരിക്കും ഡിസയേ മത്സരിക്കേണ്ടി വരുക.