രാജ്യത്തെ ഏറ്റവും വലിയ മാംസാഹാരപ്രിയര്‍ മലയാളികള്‍…!

രാജ്യത്തെ ഏറ്റവും വലിയ അറവുകാരും മാംസാഹാരപ്രിയരും മലയാളികളെന്ന് റിപ്പോര്‍ട്ട്. കേന്ദ്ര മൃഗ പരിപാലന മന്ത്രാലയം നടത്തിയ സാമ്പിള്‍ സര്‍വേയിലാണ് ഇക്കാര്യമുള്ളത്. കന്നുകാലികളെ കൊന്നുതിന്നുന്നവരുടെ 2015-16 പട്ടികയില്‍ കേരളം ഒന്നാമതുണ്ട്. പ്രസ്താവിച്ച വര്‍ഷങ്ങളില്‍ കേരളത്തില്‍ 11.7 ലക്ഷം കന്നുകാലികളെയും 69,170 ക്ടാവുകളെയും അറുത്തു. കേരളത്തിന് തൊട്ടു പിന്നിലുള്ള ബീഹാറില്‍ 4.09 മൃഗങ്ങളും രണ്ടു ലക്ഷം കന്നുകാലി കുഞ്ഞുങ്ങളെയും ഇറച്ചിയാക്കി. മറ്റ് സംസ്ഥാനങ്ങളെയെല്ലാം പിന്നിലാക്കി കുതിക്കുന്ന കേരളത്തില്‍ മൃഗക്രൂരത 2009 നെ അപേക്ഷിച്ച് മൂന്ന് മടങ്ങായിട്ടാണ് കൂടിയതെന്നാണ് കണക്കുകള്‍ പറയുന്നത്.

ബീഹാര്‍ മുന്നിലുണ്ടായിരുന്ന 2009-10 ല്‍ 4.98 ലക്ഷം കന്നുകാലികളെ കേരളത്തില്‍ അറവ് കത്തിക്ക് ഇരയാക്കിയപ്പോള്‍ ബീഹാറിലെ കണക്ക് 5.25 ലക്ഷമായിരുന്നു. മൃഗമാംസം കഴിക്കുന്നത് മതവിശ്വാസത്തെ ഹനിക്കുന്നില്ല എന്നതാണ് കാരണമെന്നും മന്ത്രാലയം കണ്ടെത്തുന്നു. പശുവും കാളയും പോത്തുമൊക്കെയായി കേരളത്തിലെ ജനസംഖ്യയുടെ ഭൂരിഭാഗവും മാംസാഹാര പ്രിയരാണെന്നും മന്ത്രാലയ റിപ്പോര്‍ട്ടില്‍ പറയുന്നു. പോത്തിറച്ചി ഉല്‍പ്പാദിപ്പിക്കുന്നവരുടെ കാര്യത്തില്‍ ഉത്തര്‍പ്രദേശാണ് മുന്നില്‍. കേരളം ഇക്കാര്യത്തില്‍ രണ്ടാമതുള്ള ആന്ധ്രയോടും പഞ്ചാബിനോടും നേരിയ വ്യത്യാസത്തില്‍ മാത്രമാണ് പിന്നില്‍ നില്‍ക്കുന്നത്.