കുഞ്ഞാലിക്കുട്ടിക്ക് മോദിയുടെ സമ്മാനം

ഉണ്ണികൃഷ്ണന്‍

മലപ്പുറം ഉപതിരഞ്ഞെടുപ്പില്‍ 171023 വോട്ടിന് വിജയം നേടിയ കുഞ്ഞാലിക്കുട്ടി ഇത്തരിപോണ ഈര്‍ക്കിലി പാര്‍ട്ടിയുമായി ഡല്‍ഹിയില്‍ ചെന്നിട്ട് എന്തൂട്ട് കാട്ടാനാ എന്നാണ് കേരളത്തിലെ സുരേന്ദ്രാദികളുടെയും മുരളീധരാന്മാരുടെയും വിചാരം.

എങ്കില്‍ നിങ്ങള്‍ ഒന്ന് ഉറപ്പിച്ചോളീന്‍ മൂപ്പര് ഡല്‍ഹീക്ക് വണ്ടി കയറണത് ഒന്നു കാണാണ്ടല്ല, ഒത്തിരീ കണ്ടീട്ട് തന്നെയാണ്. ഷാജി കൈലാസ് രഞ്ജീ പണീക്കര്‍ പടത്തിലെ ഡയലോഗ് കടം മേടീച്ചാ ഇങ്ങനെ പറയാം. ഇത്തിരിപോണ പഞ്ചായത്തില്‍ കാവികൊടി നാട്ടി കളിക്കൂന്ന ബി ജെ. പി യല്ല അങ്ങ് ഡല്‍ഹീലെ ബി ജെ. പി എന്ന് നല്ല ബോധ്യംവന്നിട്ട് തന്നെയാണ് കേരളത്തിലെ താളംകളി മതിയാക്കി അങ്ങോട്ട് വണ്ടി പിടിക്കണത്. എന്നു കരുതി നാളെ രാവിലെ നരേന്ദ്രമോദിക്ക് സിന്ദാബാദ് വിളിച്ച് മന്ത്രിയാകും എന്ന് കരുതണ്ട, അത് ഉടനെയെങ്ങും നടക്കുകയുമില്ല. പക്ഷെങ്കീല് 2019 ഓപ്പറേഷന്‍ താമരയില്‍ മൂപ്പര് ഒരു കളി കളിക്കും എന്ന് നമ്മള്‍ക്ക് ഉറപ്പിക്കാം. കാരണം ഡല്‍ഹിയിലെ പ്രതിപക്ഷ നിരയിലെ ഏറ്റവും തലയെടുപ്പുള്ള നേതാവായി മാറുകയാണ് കുഞ്ഞാലിക്കുട്ടി. അതിനൊപ്പം നരേന്ദ്രമോദി കൊതിക്കുന്ന അന്തര്‍ദേശീയ ബന്ധങ്ങളുള്ള ഒരു ഒന്നാംതരം ഇന്ത്യന്‍ മുസ്‌ളീം .

സെക്കുലര്‍ ഇന്ത്യന്‍ അംബാസിഡര്‍

കേരളത്തില്‍ നിന്ന് ജയിച്ചെത്തുന്ന ഈ മുസ്‌ളീം നേതാവിനെ അതേ കുപ്പായത്തല്‍ തന്നെ അന്തര്‍ദേശീയ വേദികളില്‍ എത്തിക്കാനാവും നരേന്ദ്രമോദി സര്‍ക്കാരും, സംഘപരിവാറും തീരുമാനിക്കുക. കാരണം ഇന്ത്യയിലെ മുസ്‌ളീം രാഷ്ട്രീയത്തില്‍ മതമൗലികവാദികള്‍ പിടിമുറുക്കിയപ്പോള്‍ അതിനെതിരെ പൊരുതി നിന്ന നേതാവാണ് പി കെ കുഞ്ഞാലിക്കുട്ടി എന്നതു തന്നെയാണ് കാരണം. ഇന്ത്യയില്‍ ഇപ്പോള്‍ പടര്‍ന്നു പന്തലിക്കുന്ന പല മുസ്‌ളീം രാഷ്ട്രീയത്തിനു പിന്നിലും പണമെറിഞ്ഞു കളിക്കുന്നത് നേര്‍ രാഷ്ട്രീയത്തിന്റെ വക്താക്കള്‍ അല്ലാ എന്ന് തിരിച്ചറിഞ്ഞു കഴിഞ്ഞു. ഗള്‍ഫ് രാജ്യങ്ങള്‍ വരെ അതിനെതിരെ യുദ്ധപ്രഖ്യാപനം നടത്തിയ സ്ഥിതിക്ക് അവരോട് സംസാരിക്കാനും സെക്കുലര്‍ മുസ്‌ളീം മുഖമായി ഉയത്തികാണിക്കുന്നതിനും കുഞ്ഞാലിക്കുട്ടിയെ ഭാരത സര്‍ക്കാരിന് ആവശ്യമുണ്ട്. ഇന്ത്യന്‍ പാര്‍മെന്റിലെ നിര്‍ണ്ണായകമായ പല കമ്മിറ്റികളിലും ഇനി കുഞ്ഞാലിക്കുട്ടിയെ നമ്മള്‍ക്ക് പ്രതീക്ഷിക്കാം.

മേയ്ക്ക് ഇന്ത്യ

മോദിയുടെ സ്വപ്‌നപദ്ധതിയായ മേയ്ക്ക് ഇന്ത്യാ പദ്ധതിക്ക് ഏറ്റവും പിന്‍തുണ നല്‍കാന്‍ സാധിക്കുന്ന ഏക പാര്‍ലമെന്റേറിയല്‍ ഒരു പക്ഷെ കുഞ്ഞാലിക്കുട്ടി മാത്രമായിരിക്കും. ഒരു ഐടി കമ്പനി പോലുമില്ലാത്ത കേരളത്തില്‍ രണ്ടു തവണ അന്തര്‍ദേശീയ വ്യവസായസംഗമം സംഘടിപ്പിച്ച മന്ത്രിയാണ് അദ്ദേഹം. മോദി ഒന്നിലധികം തവണ വിദേശ രാജ്യങ്ങള്‍ സഞ്ചരിച്ചുവെങ്കിലും അതില്‍ നിന്ന് റിസള്‍ട്ട് വന്നിരിക്കുന്നത് തുലോം കുറവാണ്.

ഇന്ത്യയിലേക്ക് നിക്ഷപത്തിന് തയാറാകുന്നവരില്‍ 99 ശതമാനവും മുസ്‌ളീം രാഷ്ട്രങ്ങളില്‍ നിന്നുള്ള വന്‍കിട ഗ്രൂപ്പുകളാണ് അവര്‍ക്ക് ഇപ്പോഴത്തെ തീവ്ര ഹിന്ദു നേതാക്കളുമായുള്ള ഡീലുകളില്‍ ഭയമുണ്ട് എന്നത് യാഥാര്‍ത്ഥ്യമാണ്. അത് മറികടക്കാന്‍ അരുണ്‍ ജയ്റ്റ്‌ലിക്കൊപ്പം ചേര്‍ന്നു പ്രവര്‍ത്തിക്കാന്‍ സാധിക്കുന്ന ഒരു നേതാവിന്റെ മുഖമാണ് കുഞ്ഞാലിക്കുട്ടിയില്‍ തെളിയുക. അതിനാല്‍ താമസിക്കാതെ വിദേശത്തുനിന്നും സ്വദേശത്തുനിന്നുമുള്ള വന്‍കിട വ്യവസായികള്‍ ആശ്രയിക്കുന്ന നേതാവായി കുഞ്ഞാലിക്കുട്ടി ഉയരും.

ഒപ്പറേഷന്‍ താമര

2019 ലെ തിരഞ്ഞെടുപ്പ് ബി ജെ. പി ലക്ഷ്യമിടുമ്പോള്‍ അവര്‍ക്ക് ദക്ഷിണേന്ത്യയില്‍ വേണ്ടത് ഒരു ന്യൂനപക്ഷ മുഖമാണ്. അതിന് ഏറ്റവും ഉചിതം മുസ്‌ളീം ലീഗാണ്. ലീഗിനെ സംബന്ധിച്ചിടത്തോളം അതിന്റെ ശക്തികേന്ദ്രം വ്യവസായികളും , വന്‍കിട വ്യാപാരികളുമാണ്. അധികാരത്തില്‍ നിന്ന് ദീര്‍ഘകാലം അകന്നു നില്‍ക്കുന്ന ഒരു സംവിധാനം തങ്ങള്‍ പിന്‍തുണയ്ക്കുന്ന പാര്‍ട്ടിക്ക് വരുന്നതിനോട് അവര്‍ക്ക് താല്‍പര്യമുണ്ടാവില്ല. നിലവില്‍ തന്നെ ദുര്‍ബലമാണ് കേരളത്തിലെ കോണ്‍ഗ്രസ്. സംഘടന തിരഞ്ഞെടുപ്പ് നടന്നാല്‍ അത് ഉമ്മന്‍ കോണ്‍ഗ്രസാകും അവശേഷിക്കുന്ന മഹേഷുമാര്‍ അഭയം തേടുക താമരയില്‍ ആയിരിക്കും.അതിനാല്‍ ഒന്ന് ഉറപ്പിക്കാം നല്ല മൊഞ്ചള്ള സമ്മാനങ്ങളാണ് ഡല്‍ഹിയില്‍ കുഞ്ഞാപ്പയെ കാത്തിരിക്കുന്നതെന്ന്..