ആട്ജീവിതം ഉപേക്ഷിച്ചിട്ടില്ലെന്ന്‌ പൃഥ്വിരാജ്

ബെന്യാമിന്റെ ആട്ജീവിതം സിനിമയാക്കുന്നതില്‍ നിന്ന് പൃഥ്വിരാജ് പിന്മാറിയെന്ന തരത്തിലുള്ള വാര്‍ത്തകള്‍ക്കെതിരെ പൃഥ്വിരാജ് തന്നെ രംഗത്തെത്തി. ബ്ലെസിയും-പൃഥ്വിരാജും ഒന്നിക്കുന്ന ആട്ജീവിതത്തിന്റെ ഷൂട്ടിങ് ഈ നവംബറില്‍ ആരംഭിക്കാനിരിക്കെയാണ് സിനിമ ഉപേക്ഷിച്ചെന്ന വ്യാജ വാര്‍ത്തകള്‍ പ്രചരിച്ചത്.

പൃഥ്വിരാജിന് ഡേറ്റ് ഇല്ലാത്തതാണ് ചിത്രം ഉപേക്ഷിക്കാന്‍ കാരണം എന്നായിരുന്നു പ്രചരിച്ച വാര്‍ത്തകള്‍. ഇതിനു തന്റെ ഫെയ്‌സ്ബുക്ക് പേജിലൂടെയാണ് പൃഥ്വി മറുപടി നല്‍കിയത്. ആട്ജീവിതം ഉപേക്ഷിച്ചിട്ടില്ല. ഈ വര്‍ഷം നവംബര്‍ 1 മുതല്‍ 2019 മാര്‍ച്ച് 31 വരെ പല ഘട്ടങ്ങളിലായാണ് ഡേറ്റ്. പത്തു ദിവസം മുന്‍പ് സംവിധായകന്‍ ബ്ലെസിയുമായി ചര്‍ച്ച നടത്തിയിരുന്നു. ഇതിനിടയില്‍ മോഹന്‍ലാല്‍ നായകനാകുന്ന ലൂസിഫറും പൂര്‍ത്തിയാകും. എന്നാല്‍ ഇപ്പോള്‍ ആടുജീവിതം ഉപേക്ഷിച്ചെന്ന തരത്തില്‍ വരുന്ന വാര്‍ത്തകള്‍ തെറ്റാണ്. ഇത്തരം വാര്‍ത്തകളുടെ ഉറവിടം ഏതാണെന്നും വ്യക്തമില്ലെന്നും പൃഥ്വിരാജ് കുറിച്ചു.