ദേശീയ പുരസ്‌കാരം നേടിയ നടിയെ അഭിനന്ദിക്കാന്‍ സൂപ്പര്‍ താരങ്ങള്‍ക്ക് സമയമില്ല

മലയാളത്തിലേക്ക് ദേശീയ പുരസ്‌കാരം കൊണ്ടുവന്ന നടിയെ അഭിനന്ദിക്കാന്‍ സൂപ്പര്‍ താരങ്ങള്‍ക്ക് സമയമില്ല. മുഖ്യമന്ത്രി പിണറായി വിജയനും സാംസ്‌കാരിക മന്ത്രി എ.കെ ബാലനും നടി സുരഭിയെ വിളിച്ച് അഭിനന്ദനം അറിയിച്ചപ്പോള്‍ മമ്മൂട്ടിയും മോഹന്‍ലാലും ദിലീപും ഇതുവരെ വിളിച്ചില്ലെന്ന് നടി പറഞ്ഞു. രണ്ട് മൂന്നു ദിവസം തന്റെ ഫോണ്‍ ഓഫ് ആയിരുന്നു. ഒരു പക്ഷേ വിളിച്ചിട്ട് കിട്ടാത്തതാവാം. അല്ലെങ്കില്‍ തിരക്ക് കഴിഞ്ഞ് വിളിക്കാമെന്ന് അവര്‍ കരുതുന്നുണ്ടാകുമെന്നും സുരഭി പറഞ്ഞു. ദേശീയ അവര്‍ഡ് കിട്ടിയതിന്റെ പേരില്‍ സെലക്ടീവ് ആകാന്‍ കഴിയില്ല. അങ്ങനെവന്നാല്‍ ഈച്ചയാട്ടി വീട്ടില്‍ ഇരിക്കുകയേ ഉള്ളുവെന്ന് നല്ല ബോധ്യമുണ്ട്. അതിനാല്‍ എല്ലാത്തരം റോളുകളും ചെയ്യും. എല്ലാ കഥാപാത്രങ്ങളെയും മികവുറ്റതാക്കാന്‍ കഴിവുള്ള നടിയായി മാറുകയാണ് ലക്ഷ്യമെന്നും സുരഭി പറയുന്നു. കൊച്ചിയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അവര്‍.