ബച്ചനുള്‍പ്പെടെയുള്ളവര്‍ക്ക് അവാര്‍ഡ് ലഭിച്ചത് സുഹൃത്തുക്കളിരുന്നപ്പോള്‍ ; അന്നൊന്നും ഇല്ലാത്ത വിവാദം ഇപ്പോള്‍ എന്തിനെന്ന് പ്രിയദര്‍ശന്‍

ജൂറി ചെയര്‍മാന്‍ പ്രിയദര്‍ശന്റെ സുഹൃത്തുക്കള്‍ക്കായി പ്രഖ്യാപിച്ച അവാര്‍ഡ് ആണ് 64-ാമത് ദേശിയ ചലച്ചിത്ര പുരസ്‌കാരം എന്നാണ്‌ ആക്ഷേപം. മികച്ച നടനുള്ള അവാര്‍ഡ് നേടിയ അക്ഷയ്കുമാര്‍, പ്രത്യേക പരാമര്‍ശം ലഭിച്ച മോഹന്‍ലാല്‍, സ്റ്റണ്ട് മാസ്്റ്റര്‍ക്കായി പ്രത്യേക അവാര്‍ഡ് നല്‍കി പുലിമുരുകനെയും, പീറ്റര്‍ ഹെയ്‌നെയും അവാര്‍ഡിലേയ്ക്ക് എത്തിച്ചത് എന്നിവയാണ് വിമര്‍ശനത്തിന് കാരണമായത്. ഇതെല്ലാം പ്രിയന്‍ സുഹൃത്തുക്കളോട് കാണിച്ച സ്‌നേഹമാണെന്നായിരുന്നു ആക്ഷേപം.

വിമര്‍ശനങ്ങള്‍ക്ക് മറുപടിയുമായി പ്രിയദര്‍ശന്‍ തന്നെ രംഗത്തെത്തി. കഴിഞ്ഞ വര്‍ഷം ജൂറി ചെയര്‍മാനായിരുന്ന രമേഷ് സിപ്പി അമിതാഭ് ബച്ചനാണ് അവാര്‍ഡ് നല്‍കിയത്. രമേശ് സിപ്പിയുടെ അടുത്ത സുഹൃത്താണ് അമിതാഭ് ബച്ചന്‍. അന്ന് അദ്ദേഹത്തെ ആരും ചോദ്യം ചെയ്തില്ല. മാത്രമല്ല പ്രകാശ് ഷാ ജൂറിയായിരുന്ന സമയത്ത് സുഹൃത്ത് അജയ് ദേവ്ഗണിന് മികച്ച നടനുള്ള പുരസ്‌കാരം ലഭിച്ചു. അന്നും വിവാദങ്ങള്‍ ഉണ്ടായില്ല. പിന്നെ എന്തിനാണ് ഇന്ന് അവാര്‍ഡിനെ ചൊല്ലി ചോദ്യങ്ങളുണ്ടാക്കുന്നതെന്ന് പ്രിയദര്‍ശന്‍ പറഞ്ഞു.