കെ.എം മാണിക്കെതിരായ ബാര്‍ കോഴക്കേസ്: വിജിലന്‍സിന് കോടതിയുടെ വിമര്‍ശനം

കെ.എം മാണിക്കെതിരായ ബാര്‍കോഴക്കേസില്‍ വിജിലന്‍സിന് വീണ്ടും ഹൈക്കോടതിയുടെ വിമര്‍ശനം. തുടരന്വേഷണം റദ്ദാക്കണമെന്ന കെ.എം മാണിയുടെ ഹര്‍ജിയില്‍ രണ്ട് സത്യവാങ്മൂലം സമര്‍പ്പിച്ചതിനാണ് ഹൈക്കോടതി അന്വേഷണ ഉദ്യോഗസ്ഥനെ വിമര്‍ശിച്ചത്. വിജിലന്‍സിന്റെ ഭാഗത്തുനിന്ന് ന്യായീകരണമല്ല, വ്യക്തമായ മറുപടിയാണ് വേണ്ടത്. നിയമവും ചട്ടവും എല്ലാവര്‍ക്കും ബാധകമല്ലേയെന്നും കോടതി ആരാഞ്ഞു. അന്വേഷണ ഉദ്യോഗസ്ഥനായ സി.ഐയെ കോടതി ശാസിക്കുകയും ചെയ്തു.

രണ്ട് തവണ കേസ് അവസാനിപ്പിച്ചിട്ടും വീണ്ടും അന്വേഷിക്കാനുള്ള കാരണം എന്താണെന്ന് അന്വേഷിച്ച കോടതി, കേസില്‍ അന്വേഷണ സംഘത്തിന് വ്യക്തമായ ധാരണയില്ലേയെന്നും വിമര്‍ശിച്ചു. കോടതിയെ രാഷ്ട്രീയം കളിക്കുന്നതിനുള്ള വേദിയാക്കരുതെന്നും ഹൈക്കോടതി താക്കീത് നല്‍കി. മാണിയുടെ ഹര്‍ജിയില്‍ രണ്ട് സത്യവാങ്മൂലം സമര്‍പ്പിച്ചത് സംബന്ധിച്ച് നേരത്തെ കോടതി വിശദീകരണം തേടിയിരുന്നുവെങ്കിലും വ്യക്തമായ മറുപടി നല്‍കാന്‍ വിജിലന്‍സിന് കഴിഞ്ഞിരുന്നില്ല.