ശശീന്ദ്രനെതിരായ ആരോപണത്തില്‍ ജുഡീഷ്യല്‍ അന്വേഷണം

മുന്‍മന്ത്രി എ.കെ ശശീന്ദ്രന്‍ പരാതിക്കാരിയായ യുവതിയോട് ലൈംഗിക ചുവയോടെ ഫോണില്‍ സംസാരിച്ചുവെന്ന ആരോപണത്തില്‍ സര്‍ക്കാര്‍ ജുഡീഷ്യല്‍ അന്വേഷണം പ്രഖ്യാപിച്ചു. അന്വേഷണ കമ്മീഷനെ മന്ത്രിസഭാ യോഗം തീരുമാനിക്കും. ശശീന്ദ്രന്റെ രാജി ധാര്‍മ്മികതയുടെ അടിസ്ഥാനത്തിലാണ്. കുറ്റമേറ്റല്ല രാജിയെന്നും മുഖ്യമന്ത്രി പിണറായി വിജയന്‍ പറഞ്ഞു. തിരുവനന്തപുരത്ത് ചേര്‍ന്ന ഉന്നതാധികാര യോഗത്തിനു ശേഷം മാധ്യമങ്ങളെ കാണുകയായിരുന്നു പിണറായി വിജയന്‍.

ദേവികുളം സബ്കലക്ടറെ മാറ്റുന്ന കാര്യം ഇപ്പോള്‍ പരിഗണയിലില്ല. മൂന്നാറിലെ കയ്യേറ്റം ഒരു തരത്തിലും അംഗീകരിക്കില്ല. അവര്‍ക്കെതിരെ നിര്‍ദാക്ഷിണ്യം നടപടിയുണ്ടാകും. എന്നാല്‍ നൂറ്റാണ്ടുകളായി അവിടെ താമസിച്ചുവരുന്നവരെ സംരക്ഷിക്കും. രാജേന്ദ്രന്‍ എം.എല്‍.എയുടെ വീട് പട്ടയ ഭൂമിയിലാണെന്നും കയ്യേറ്റ ഭൂമിയിലല്ലെന്നും മുഖ്യമന്ത്രി വ്യക്തമാക്കി. ഭൂമി കയ്യേറിയുള്ള പാര്‍ട്ടി ഓഫീസുകള്‍ നീക്കുമോ എന്ന ചോദ്യത്തിന് നിങ്ങള്‍ക്ക് പല താല്‍പര്യങ്ങളുമുണ്ടാകും. എല്ലാ പരിശോധിക്കപ്പെടുമെന്നുമായിരുന്നു മുഖ്യമന്ത്രിയുടെ മറുപടി.