വയനാടന്‍ ചുരത്തില്‍ ഇനി പറക്കാം

വിനോദ സഞ്ചാരികള്‍ക്ക് ആവേശമായി വയനാടന്‍ ചുരം പറക്കാന്‍ കേബിള്‍ കാറുകളെത്തും.പദ്ധതി നടപ്പാക്കാനുള്ള പ്രവര്‍ത്തനങ്ങള്‍ ആരംഭിച്ചു കഴിഞ്ഞു.വയനാട് ചേംബര്‍ ഓഫ് കൊമേഴ്‌സാണ് പദ്ധതി നടത്തിപ്പിനു പിന്നില്‍.ദുബായ് ചേംബര്‍ ഓഫ് കൊമേഴ്‌സുമായി ചേര്‍ന്ന് നടപ്പാക്കുന്നപദ്ധതിയ്ക്ക് ഏപ്രില്‍ 15ന് ദുബായില്‍ നടക്കുന്ന ഇന്‍വസ്റ്റേഴ്‌സ് മീറ്റോടെ കാര്യങ്ങള്‍ കൂടുതല്‍ വേഗത്തിലാക്കും.

വയനാട് റോപ് വേ എന്നാണ് പദ്ധതിയുടെ പേര്.അടിവാരം മുതല്‍ ലക്കിടി വരെയാണ് റോപ് വേ പ്ലാനുകള്‍ ഒരുക്കുന്നത്.പദ്ധതിയുടെ ആദ്യ ഘട്ട സര്‍വ്വേ പൂര്‍ത്തിയായി.പദ്ധതി നടപ്പാക്കാനുള്ള വിശദമായ സര്‍വ്വേ ഉടന്‍ തുടങ്ങും. 50 കോടിയാണ് പദ്ധതി നടത്തിപ്പിനായി പ്രതീക്ഷിക്കുന്നത്.കേബിള്‍ കാറില്‍ നിക്ഷേപിക്കാന്‍ വിദേശമല മലയാളികളടക്കം നിരവധി പേര്‍ മുന്നോട്ടു വന്നതായി ചേംബര്‍ ഓഫ് കൊമേഴ്‌സ് പ്രസിഡന്റ് ജോണി പാറ്റാനി അറിയിച്ചു.

ആറു പേര്‍ക്കാണ് ഒരു കേബിള്‍ കാറില്‍ കയറാനാകുന്നത്.എണ്‍പതു ക്യാബിനുകളാണ് തുടക്കത്തിലുണ്ടാകുക.480 പേര്‍ക്ക് ഒരേ സമയം ഇതില്‍ യാത്ര ചെയ്യാം.ഗതാഗതക്കുരുക്ക് ഒഴിവാക്കി ചുരം യാത്ര ആനായാസമാക്കാനാകും.10 മുതല്‍ 15 വരെ ടവറുകളാണ് റോപ് വേയ്ക്കായി നിര്‍മ്മിക്കേണ്ടത്.ടവറുകളില്‍ സ്ഥാപിച്ച കണ്‍വേറുകളിലൂടെ തൂങ്ങി കിടക്കുന്ന രീതിയാണ് കേബിള്‍ കാറുകള്‍ തയ്യാറാക്കുന്നത്.റോപ് വേയ്ക്ക് താഴെ പൂമരങ്ങളും വെച്ചു പിടിപ്പിക്കും.ഇത്തരത്തില്‍ വിനോദ സഞ്ചാരികളെ കൂടുതല്‍ ആകര്‍ഷിക്കാന്‍ വിനോദ സഞ്ചാര വകുപ്പും ഈ പദ്ധതിയില്‍ പങ്കാളികളാകും.എല്ലാത്തരത്തിലുമൊരാകാശ വിസ്മയമാണ് റോപ് വേ പദ്ധതി വിഭാവനം ചെയ്യുന്നത്. പദ്ധതി നടത്തിപ്പില്‍ പരിസ്ഥിതി ആഘാതമൊന്നുമില്ലാത്തതിനാല്‍ വകുപ്പുകളുടെ അനുമതി വേഗത്തില്‍ കിട്ടുമെന്നാണ് പ്രതീക്ഷിക്കുന്നത്.കാശ്മീരിലും ഡെറാഡൂണിലുമാണ് ഇത്തരത്തില്‍ വലിയ റോപ് വേകള്‍ ഉള്ളത്.സാധാരണക്കാര്‍ക്കു കൂടി അനുയോജ്യമായ തരത്തിലാണ് വയനാട്ടില്‍ റോപ് വേ ഒരുക്കുന്നത്.