“ആ കട്ടിലുകണ്ട് ആരും പനിക്കേണ്ട…” : ജേക്കബ് തോമസിന് മുഖ്യമന്ത്രി പിണറായി വിജയന്റെ പിന്തുണ

അഴിമതിക്കാർക്കെതിരെ വിട്ടുവീഴ്ചയില്ലാത്ത നടപടിയെടുക്കുന്ന ഉദ്യോഗസ്ഥനാണ് വിജിലൻസ് ഡയറക്ടർ ജേക്കബ് തോമസെന്ന് മുഖ്യമന്ത്രി പിണറായി വിജയന്‍ നിയമസഭയില്‍. അഴിമതിക്കാര്‍ക്കെതിരെ ശക്തമായ നിലപാട് സ്വീകരിക്കുന്ന വ്യക്തിയാണ് ജേക്കബ് തോമസ്. മാധ്യമ വാര്‍ത്തകളുടെ അടിസ്ഥാനത്തില്‍ അദ്ദേഹത്തിനെതിരെ നടപടിയെടുക്കില്ല. അദ്ദേഹം മാറണമെന്ന് ആഗ്രഹിക്കുന്ന പലരുമുണ്ട്. ആ കട്ടിലുകണ്ട് ആരും പനിക്കേണ്ടെന്നും, അദ്ദേഹം അഴിമതി നടത്തിയെങ്കില്‍ സംരക്ഷിക്കില്ലെന്നും പിണറായി സഭയില്‍ പറഞ്ഞു. പ്രതിപക്ഷത്തിന്റെ രൂക്ഷ വിമര്‍ശനത്തിനിടെയാണ് മുഖ്യന്റെ ശക്തമായ നിലപാട്.

ജേക്കബ് തോമസ് അഴിമതി നടത്തിയെന്ന് ആരോപിച്ച് പ്രതിപക്ഷം സഭയില്‍ സമര്‍പ്പിച്ച അടിയന്തര പ്രമേയത്തിന് മറുപടി നല്‍കുകയായിരുന്നു മുഖ്യമന്ത്രി. അഴിമതിക്കെതിരെ കുരിശു യുദ്ധം നടത്തുന്ന ജേക്കബ് തോമസ് നടത്തിയത് ഞെട്ടിപ്പിക്കുന്ന ക്രമക്കേട് ആണെന്നും, ജേക്കബ് തോമസിനെ ആര് ചുവപ്പു കാര്‍ഡ് കാണിക്കുമെന്നും പ്രമേയം നല്‍കിയ എം വിന്‍സന്റ് എംഎല്‍എ ചോദിച്ചു.