ലീഗില്‍ അവ്യക്തത തുടരുന്നു:സ്ഥാനാര്‍ത്ഥിയാകാന്‍ ആഗ്രഹമുന്നയിച്ച് നിരവധി പേര്‍

മലപ്പുറത്ത് ഉപതെരഞ്ഞെടുപ്പില്‍ ആരു സ്ഥാനാര്‍ത്ഥിയാകുമെന്ന കാര്യത്തില്‍ മുസ്ലിം ലീഗിലും യുഡിഎഫിലും ധാരണയായില്ല.ഇതിനിടയില്‍ സ്ഥാനാര്‍ത്ഥിയാകാനുള്ള ആഗ്രഹം നിരവധി പേര്‍ പാണക്കാട് ഹൈദരലി തങ്ങളെ അറിയിച്ചു കഴിഞ്ഞു.പാര്‍ട്ടി പറയുകയാണെങ്കില്‍ മല്‍സരിക്കാമെന്ന് ഇ അഹമ്മദിന്റെ മകള്‍ ഡോ.ഫൗസിയ ഷെര്‍ഷാദും അറിയിച്ചിട്ടുണ്ട്.എന്നാല്‍ മണ്ഡലത്തില്‍ പുതുമുഖങ്ങളെ മല്‍സരിപ്പിക്കാന്‍ ലീഗ് തയ്യാറായേക്കില്ല.പരിചയ സമ്പന്നനായ ഒരാള്‍ ഡല്‍ഹിയിലേക്ക് പോകുന്നതാണ് ലീഗിന് താല്പര്യം.

ഇതിനിടയില്‍ ലീഗിലും യു ഡി എഫിലും നിലനില്‍ക്കുന്ന അഭിപ്രായ വ്യത്യാസങ്ങള്‍ പരിഹരിക്കാനുള്ള ഉഭയകക്ഷി ചര്‍ച്ചകളും നടക്കുന്നുണ്ട്.കുഞ്ഞാലിക്കുട്ടി ഡല്‍ഹിയിലേക്ക് പോയാല്‍ സംസ്ഥാന ലീഗ് രാഷ്ട്രീയത്തിലുണ്ടാകുന്ന വിടവ് നികത്താന്‍ ബദല്‍ മാര്‍ഗങ്ങള്‍ ലീഗ് കണ്ടെത്തേണ്ടി വരും.മലബാര്‍ മേഖലയില്‍ ലീഗിനുള്ള സ്വാധീനം നിലനിര്‍ത്താന്‍ യു ഡി എഫിനും ലീഗിനും കുഞ്ഞാലിക്കുട്ടിയുടെ സാനിധ്യം കേരളത്തിലാവക്യമാണു താനും.അതുകൊണ്ടു തന്നെ സ്ഥാനാര്‍ത്ഥി തീരുമാനത്തില്‍ കൂടുതല്‍ കുരുക്കിലേക്ക് നീങ്ങാനാണ് സാധ്യത.