വാളയാറിലെ ആത്മഹത്യ ചെയ്ത 11 കാരി പീഡിപ്പിക്കപ്പെട്ടിരുന്നെന്ന വെളിപ്പെടുത്തലുമായി അമ്മ

വാളയാറില്‍ ആത്മഹത്യ ചെയ്ത ആദ്യത്തെ പെണ്‍കുട്ടിയെ കുട്ടിയുടെ ബന്ധു പല തവണ പീഡിപ്പിച്ചിരുന്നതായി കുട്ടികളുടെ അമ്മ മൊഴി നല്‍കി.ജനുവരി 12 ന് ആത്മഹത്യ ചെയ്ത പെണ്‍കുട്ടിയെ ബന്ധു പല തവണ പീഡിപ്പിച്ചിരുന്നെന്നാണ് അമ്മ മൊഴി നല്‍കിയിരിക്കുന്നത്.കുട്ടി മരിക്കുന്നതിന് ഒരു വര്‍ഷം മുന്‍പ് പീഡന വിവരമറിഞ്ഞപ്പോള്‍ തന്നെ അയാളെ താക്കീതു ചെയ്തിരുന്നതാണ്.എന്നാല്‍ അയാള്‍ വീണ്ടും കുട്ടിയെ ഉപദ്രവിക്കുന്നത് തുടര്‍ന്നു.കുട്ടി മരിച്ച സമയത്ത് പൊലീസിനോട് വിവരം പറഞ്ഞിരുന്നതാണ്.ഇയാളെ പല തവണ താക്കീതു ചെയ്തിരുന്നെന്നും അവര്‍ മൊഴി നല്‍കിയിട്ടുണ്ട്.

കൂലിപ്പണക്കാരാണ് മരിച്ച കുട്ടികളുടെ മാതാപിതാക്കള്‍.ഒരിക്കല്‍ പണിക്കു പോയി തിരികെ വന്നപ്പോള്‍ കുട്ടിയുടെ ബന്ധുവായ ഇയാള്‍ അവളെ ഉപദ്രവിക്കുന്നത് നേരില്‍ കണ്ടതാണ്.അന്നത് പൊലീസിനോട് പറയാന്‍ കഴിഞ്ഞില്ല.എന്നാല്‍ ആദ്യത്തെ കുട്ടിയുടെ മരണശേഷം ഈ വിവരം പൊലീസിനോട് പറഞ്ഞതാണ്.കുട്ടി മരിച്ച ദിവസം രണ്ടു പേര്‍ വീട്ടില്‍ വന്നു പോയിരുന്നതായും ഇളയകുട്ടി അന്നു പറഞ്ഞിരുന്നു. മൂത്ത കുട്ടി മരിച്ച് അന്‍പത്തി രണ്ടു ദിവസത്തിനു ശേഷം ഇളയകുട്ടിയും വീടിനുള്ളില്‍ തൂങ്ങി മരിച്ച നിലയിലാണ് കാണപ്പെട്ടത്.ഇളയകുട്ടിക്ക് ഒന്‍പത് വയസാണ് പ്രായം.കുട്ടികളുടെ അടുത്ത ബന്ധുവാണ് ഇവരെ പീഡിപ്പിച്ചതെന്നാണ് വിവരം.രണ്ടു കുട്ടികളുടെയും പോസ്റ്റുമോര്‍ട്ടം റിപ്പോര്‍ട്ടില്‍ കുട്ടികള്‍ പീഡനത്തിനിരയായതായി റിപ്പോര്‍ട്ടുണ്ടെന്ന് ഐ ജി എം ആര്‍ അജിത് കുമാര്‍ അറിയിച്ചു.കുട്ടികളുടെ അമ്മയുടെ ഇളയച്ഛന്റെ മകന്‍ ഇതു സംബന്ധിച്ച് പൊലീസ് കസ്റ്റഡിയിലാണ്.