നടിയെ ആക്രമിച്ച കേസില്‍ ക്വട്ടേഷനില്ല?

നടിയെ തട്ടിക്കൊണ്ടു പോയി ആക്രമിച്ച കേസില്‍ ക്വട്ടേഷനില്ലെന്ന നിഗമനത്തിലേക്ക് പൊലീസ്.ക്വട്ടേഷന്‍ സംബന്ധിച്ച് യാതൊരു തെളിവുകളും ഇതുവരെ ലഭിക്കാത്ത സാഹചര്യത്തിലാണ് ഈ നിഗമനം.സംഭവവുമായി ബന്ധപ്പെട്ട് അറസ്റ്റിലായ മുഖ്യപ്രതി പള്‍സര്‍ സുനി ക്വട്ടേഷനാണെന്ന മൊഴിയാണ് ആദ്യം നല്‍കിയിരുന്നത്.എന്നാല്‍ ക്വട്ടേഷനാണെന്ന് പറഞ്ഞ് നടിയെ ഭീഷണിപ്പെടുത്തി വശത്താക്കാനാണ് ഇയാളും കൂട്ടരും ശ്രമിച്ചതെന്നാണ് അന്വേഷണ സംഘത്തിന്റെ വിലയിരുത്തല്‍.കസ്റ്റഡിയിലുള്ള മറ്റു പ്രതികളായ വിജീഷ്,മണികണ്ഠന്‍,വടിവാള്‍ സലി,പ്രദീപ്,ഡ്രൈവര്‍ മാര്‍ട്ടിന്‍ എന്നിവരെ മാറിമാറി ചോദ്യം ചെയ്തിട്ടും ക്വട്ടേഷന്‍ സംബന്ധിച്ച് ഇതു വരെ ഒരു വിവരവും ലഭ്യമായിട്ടില്ല.

അശ്ലീല ചിത്രങ്ങള്‍ ചിത്രീകരിച്ച് വില്‍ക്കുന്ന ഒരു സംഘമാണ് ഇതിനു പിന്നിലെന്നാണ് ഇപ്പോഴത്തെ നിഗമനം.പളസര്‍ സുനിയുടെ ഒരു വര്‍ഷം മുന്‍പ് മുതലുള്ള മൊബൈല്‍ കോളുകളും സന്ദേശങ്ങളും പൊലീസ് പരിശോധിക്കുന്നുണ്ട്.ഇതു കൂടി പൂര്‍ത്തിയായാല്‍ മാത്രമേ കേസ് സംബന്ധിച്ചുള്ള അന്വേഷണം പൂര്‍ത്തിയാകൂ.ഗൂഡാലോചന സംബന്ധിച്ചുള്ള കൂടുതല്‍ അന്വേഷണം വേണമെന്ന് പൊലീസ് കോടതിയെ ധരിപ്പിച്ചിരുന്നു.

പള്‍സര്‍ സുനി, വിജീഷ് എന്നിവരുടെ കസ്റ്റഡി കാലാവധിയും നീട്ടാന്‍ അന്വേഷണ സംഘം ആലോചിക്കുന്നുണ്ട്. ഇതിനായുള്ള അപേക്ഷ സമര്‍പ്പിച്ചേക്കും. ആദ്യ റിമാന്‍ഡ് കാലാവധിയില്‍ മാത്രമേ പ്രതികളെ ചോദ്യം ചെയ്യാന്‍ കസ്റ്റഡിയില്‍ ലഭിക്കുകയുള്ളൂ. വരുന്ന 10 നാണു സുനി, വിജീഷ് എന്നിവരുടെ ആദ്യ റിമാന്‍ഡ് കാലാവധി തീരുന്നത്. നടിയെ ആക്രമിക്കുന്ന രംഗം മൊബൈല്‍ ഫോണ്‍ കണ്ടെത്താന്‍ ഇന്നലെയും പൊലീസിനു കഴിഞ്ഞിട്ടില്ല.