ജീവിതശൈലീ രോഗികള്‍ക്ക്പ്രാഥമികാരോഗ്യ കേന്ദ്രങ്ങള്‍; പ്രമേഹം, കൊളസ്‌ട്രോള്‍, രക്തസമ്മര്‍ദ്ദ രോഗികള്‍ക്ക് പ്രാഥമികാരോഗ്യ കേന്ദ്രങ്ങളില്‍ നിന്നും മരുന്ന് നല്‍കാന്‍ നടപടി

ജീവിതശൈലീ രോഗങ്ങളുടെ പരിശോധനകളും മരുന്നു വിതരണവും പ്രാഥമീകാരോഗ്യ കേന്ദ്രങ്ങള്‍ വഴി നടപ്പാക്കുമെന്ന് ധനമന്ത്രി തോമസ് ഐസക്. പ്രമേഹം, കൊളസ്‌ട്രോള്‍, രക്തസമ്മര്‍ദ്ദ രോഗികള്‍ക്ക് പ്രാഥമികാരോഗ്യ കേന്ദ്രങ്ങളില്‍ നിന്നും മരുന്ന് നല്‍കാന്‍ നടപടിയുണ്ടാക്കുമെന്ന് പുതിയ ഇടതു സര്‍ക്കാരിന്റെ ബജറ്റിലാണ് തോമസ് ഐസക്ക് ഇക്കാര്യം വ്യക്തമാക്കിയത്

സംസ്ഥാനത്തെ പൗരന്മാരുടെ ആരോഗ്യത്തിന് കൂടുതല്‍ പ്രാധാന്യം നല്‍കുമെന്നും ഇതിനായി സംസ്ഥാനത്തെ മുഴുവന്‍ വ്യക്തികളുടേയും ആരോഗ്യ വിലയിരുത്തല്‍ നടപ്പാക്കുമെന്നും പറഞ്ഞു. ആശുപത്രികള്‍ കൂടുതല്‍ രോഗീ സൗഹൃദമാക്കി മാറ്റുമെന്നും മെഡിക്കല്‍ കോളേജുകളിലെ ഡോക്ടര്‍മാരുടെയും അനുബന്ധ ജീവനക്കാരുടെയും കുറവ് നികത്താന്‍ നടപടി സ്വീകരിക്കുമെന്നും പറഞ്ഞു. 170 ആശുപത്രികളെ ​‍പ്രാഥമികാരോഗ്യകേന്ദ്രമാക്കി മാറ്റും.

ആയിരത്തില്‍ പരം കോടി രൂപ രോഗികളുടെ സഹായത്തിനായി ലഭിക്കുന്ന സാഹചര്യം സൃഷ്ടിക്കും. കാരുണ്യ പദ്ധതിയില്‍ നിന്നും 350 കോടി രൂപ ചികിത്സാസഹായം നല്‍കും. കിഫ്ബിയില്‍ നിന്നും ജില്ലാ താലൂക്ക് ആശുപത്രികളുടെ വികസനത്തിന് 2,000 കോടി രൂപ അനുവദിക്കും. പ്രാഥമികാരോഗ്യ കേന്ദ്രങ്ങളില്‍ 5257 തസ്തികകള്‍ സൃഷ്ടിക്കുകയും. മികച്ച സാന്ത്വന പരിചരണത്തിന് മുഹമ്മ പഞ്ചായത്തിലെ സി. കെ. വാസുവിന്റെ പേരില്‍ പുരസ്‌ക്കാരം ഏര്‍പ്പെടുത്തുകയും ചെയ്യുമെന്ന് ധനമന്ത്രി ബജറ്റ് അവതരണവേളയില്‍ വ്യക്തമാക്കി.