തലയെടുക്കാൻ വരുന്നവരോട് …, ഭീരുവിന്റെ ഭീഷണി കേള്‍ക്കുമ്പോള്‍ ഭയം തോന്നാന്‍ ഞങ്ങളാരും തന്നെ ‘ശാഖ’ യില്‍ വളര്‍ന്നവരല്ലെന്ന് : എംസ്വരാജ്

മുഖ്യമന്ത്രി പിണറായി വിജയനെതിരെ വധഭീഷണി ഉയര്‍ത്തിയ ആര്‍എസ്എസിന് രൂക്ഷമായ ഭാഷയിലുള്ള മറുപടിയുമായി എംസ്വരാജ് എംഎല്‍എ. തലയെടുക്കുമെന്ന് ആക്രോശിക്കുമ്പോഴല്ല, മറിച്ച് ഒരാളുടെയെങ്കിലും ജീവന്‍ രക്ഷിക്കാന്‍ കഴിയുമ്പോഴാണ് ഏതൊരു നേതാവും ധീരനാവുകയെന്ന് സ്വരാജ് പറഞ്ഞു. മരിച്ച് വീഴുമ്പോള്‍ തീര്‍ന്ന് പോകുന്നവരല്ല തങ്ങളെന്നും ഭീരുവിന്റെ ഭീഷണി കേള്‍ക്കുമ്പോള്‍ ഭയം തോന്നാന്‍ ഞങ്ങളാരും തന്നെ ‘ശാഖ’ യില്‍ വളര്‍ന്നവരല്ലെന്നും സ്വരാജ് തന്റെ ഫേസ്‌ബുക്ക് പോസ്റ്റിലൂടെ മറുപടി പറഞ്ഞു.

സ്വരാജിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം:

തലയെടുക്കാൻ വരുന്നവരോട് ...

തലയെടുക്കുമെന്ന് ആക്രോശിക്കുമ്പോഴല്ല , ഒരാളുടെയെങ്കിലും ജീവൻ രക്ഷിക്കാൻ കഴിയുമ്പോഴാണ് ഒരു നേതാവ് ധീരനാവുന്നത്.

ഞങ്ങളൊരുപാടു പേരെ കൊന്നിട്ടുണ്ടെന്ന് അലറി പ്രസംഗിക്കുമ്പോഴല്ല , ഒരാളെ പോലും കൊന്നിട്ടില്ലെന്ന് പറയാൻ കഴിയുമ്പോഴാണ് ഒരു നേതാവിന് അഭിമാനം തോന്നേണ്ടത്.

കൊല്ലാനുള്ള നിങ്ങളുടെ ശേഷിയല്ല ,മരിക്കുവാനുള്ള ഞങ്ങളുടെ സന്നദ്ധതയാണ് ധീരത .

കൊന്നവരുടെ ഭീരുത്വമല്ല , കൊല്ലപ്പെട്ടവരുടെ ധീരതയാണ് ചരിത്രം സൃഷ്ടിച്ചത്.

മരിച്ചു വീഴുമ്പോൾ തീർന്നു പോകുന്നവരല്ല ഞങ്ങൾ. ഭീരുവിന്റെ ഭീഷണി കേൾക്കുമ്പോൾ ഭയം തോന്നാൻ ഞങ്ങളാരും 'ശാഖ' യിൽ വളർന്നവരുമല്ല .

തലയെടുക്കാൻ വാളുമായിറങ്ങുമ്പോഴോർക്കുക , നിങ്ങളുടെ വിഷപ്പല്ല് പറിച്ചെടുക്കാൻ കരുത്തുള്ള കരങ്ങൾ കാത്തിരിക്കുന്നുവെന്ന്..