ജയയെ തള്ളിയിട്ടതു തന്നെ,ആരാണെന്നറിയില്ല,വീണ്ടും ഗുരുതര ആരോപണങ്ങളുമായി പി എച്ച് പാണ്ഡ്യന്‍

തമിഴ്‌നാട് മുന്‍ മുഖ്യമന്ത്രി ജയലളിതയുടെ മരണത്തില്‍ ദുരൂഹതയുണ്ടെന്ന് ആവര്‍ത്തിച്ച് മുന്‍ സ്പീക്കറും അണ്ണാ ഡി എംകെ നേതാവുമായ പി.എച്ച്. പാണ്ഡ്യന്‍ വീണ്ടും രംഗത്ത്. പോയസ് ഗാര്‍ഡനിലെ വസതിയില്‍ വച്ച് ആരോ തള്ളിയിട്ടതിനെ തുടര്‍ന്നാണ് ജയലളിതയെ അപ്പോളോ ആശുപത്രിയില്‍ പ്രവേശിപ്പിച്ചതെന്ന് പാണ്ഡ്യന്‍ ആരോപിച്ചു.

അമ്മ വീണതിനെ തുടര്‍ന്ന് ഒരു പൊലീസുകാരനാണ് ആംബുലന്‍സ് വിളിച്ച് അവരെ ആശുപത്രിയിലെത്തിച്ചത്.അതിനു ശേഷം നടന്നത് മുഴുവന്‍ ദുരൂഹതകളാണ്.കഴിഞ്ഞ മാസവും സമാനമായ ആരോപണങ്ങള്‍ പാണ്ഡ്യന്‍ ഉന്നയിച്ചിരുന്നു.എ ഐ ഡി എം കെ വിമത നേതാവ് ഒ പനീര്‍ശെല്‍വത്തിന്റെ വസതിയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.

ജയലളിതയെ ആശുപത്രിയില്‍ പ്രവേശിപ്പിച്ച ശേഷം അപ്പോളോ ആശുപത്രി സിസിടിവി നീക്കം ചെയ്തതെന്തിനാണെന്ന് അന്വേഷിക്കണം.അമ്മ മരിച്ച ദിവസത്തേ പറ്റിയും പാണ്ഡ്യന്‍ ആരോപണം ഉന്നയിച്ചിട്ടുണ്ട്.ജയലളിത ഡിസംബര്‍ 4ന് വൈകീട്ട് നാലരയ്ക്ക് മരിച്ചതാണ്.പിന്നെയെന്തിന് മരണ വിവരം പുറത്തു വിടാന്‍ വൈകി.ആരാണ് ചികില്‍സ അവസാനിപ്പിക്കാന്‍ നിര്‍ദ്ദേശം നല്‍കിയതെന്നും പാണ്ഡ്യന്‍ ചോദിച്ചു.തനിക്കീ വിവരങ്ങളെല്ലാം ലഭിക്കുന്നത് കൃത്യമായ ശ്രോതസില്‍ നിന്നാണെന്നും പാണ്ഡ്യന്‍ പറഞ്ഞു.