നാളെ ബജറ്റ്: പുതിയ നികുതി നിര്‍ദ്ദേശങ്ങള്‍ക്ക് സാധ്യതയില്ല,ക്ഷേമ പെന്‍ഷനുകള്‍ വര്‍ദ്ധിപ്പിച്ചേക്കും

ധനമന്ത്രി തോമസ് ഐസക് സഭയുടെ 69 ഉം അദ്ദേഹത്തിന്റെ എട്ടാമതും ബജറ്റ് നാളെ സഭയില്‍ അവതരിപ്പിക്കും.ജിഎസ്ടി വരുന്നതുകൊണ്ട് പുതിയ നികുതി നിര്‍ദ്ദേശങ്ങള്‍ക്ക് സാധ്യതയില്ല.ക്ഷേമ പെന്‍ഷനുകളില്‍ 200 രൂപ വര്‍ദ്ധിപ്പിക്കാനുള്ള നീക്കവും നടക്കുന്നുണ്ട്.

രണ്ടു മാസം നീണ്ട ചര്‍ച്ചകള്‍ക്കൊടുവിലാണ് ബജറ്റ് രൂപീകരിക്കുന്നത്.വിവിധ സര്‍ക്കാര്‍ സ്ഥാപനങ്ങളും വിദഗ്ധരുമായും കൂടിയാലോചിച്ചാണ് ബജറ്റ് തയ്യാറാക്കുന്നത്.ഇന്നു രാത്രി മുഖ്യമന്ത്രി പിണറായിയെ ബജറ്റ് വായിച്ച് കേള്‍പിച്ച ശേഷം നാളെ വെളുപ്പിനെ സര്‍ക്കാര്‍ പ്രസില്‍ ബജറ്റ് അച്ചടിക്കും.

നോട്ടു നിരോധനം സൃഷ്ടിച്ച പ്രതിസന്ധിക്കുശേഷം നടത്തുന്ന ബജറ്റ് ധനമന്ത്രിയെസംബന്ധിച്ച് വലിയ വെല്ലുവിളികള്‍ നിറഞ്ഞതാണ്.റവന്യൂ വരുമാനം വര്‍ദ്ധിപ്പിക്കാന്‍ നികുതി ഇതര വഴികള്‍ തേടുമെന്നാണ് സൂചന.നവകേരള പദ്ധതികള്‍ക്ക് ഊന്നല്‍ നല്‍കിയേക്കും.വിലക്കയറ്റം നിയന്ത്രിക്കുന്നതിന് പ്രാധാന്യം നല്‍കും.സിവില്‍ സപ്ലൈസ് കോര്‍പറെഷനൊപ്പം കണ്‍സ്യൂമര്‍ ഫെഡിനെയും വിപണിയിലേക്ക് കൂടുതല്‍ എത്തിക്കുന്നതില്‍ പ്രാധാന്യമുണ്ടാകും.രണ്ടാം ഘട്ട ജനകീയാസൂത്രണ പദ്ധതി പ്രഖ്യാപിച്ച സാഹചര്യത്തില്‍ അതിനു വേണ്ട നിര്‍ദ്ദേശങ്ങളും ബജറ്റിലുണ്ടായേക്കും.ഉദ്യോഗസ്ഥ പുനര്‍വിന്യാസം,തദ്ദേശ സ്ഥാപനങ്ങളിലെ സാങ്കേതിക വിഭാഗം മെച്ചപ്പെടുത്തുന്നതിനുള്ള നിര്‍ദ്ദേശങ്ങളും ബജറ്റ് ലക്ഷ്യമിട്ടേക്കും.