മനുഷ്യക്കടത്ത് ശൃംഗലയായും പള്‍സര്‍സുനിക്ക് ബന്ധം,പി ടി തോമസ്

മനുഷ്യക്കടത്ത് ശൃംഗലയായും പള്‍സര്‍സുനിക്ക് ബന്ധം,പി ടി തോമസ് നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിക്ക് മനുഷ്യക്കടത്തുമായും ബന്ധമുള്ളതായി തൃക്കാക്കര എംഎല്‍എ പി ടി തോമസ് എംഎല്‍എ.മനുഷ്യക്കടത്തുമായി ബന്ധപ്പെട്ട് സുനി വ്യാജ പാസ്‌പോര്‍ട്ടില്‍ വിദേശ രാജ്യങ്ങളിലേക്ക് യാത്ര ചെയ്തതിന്റെ വിശദമായ വിവരം തനിക്ക് ലഭിച്ചിട്ടുണ്ടെന്നും പി ടി പറഞ്ഞു.ഇതു സംബന്ധിച്ചുള്ള വിവരങ്ങള്‍ അടങ്ങിയ കത്ത് മുഖ്യമന്ത്രിക്ക് നല്‍കിയിട്ടുണ്ടെന്നും ,വിശദമായ അന്വേഷണം നടത്തണമെന്ന് മുഖ്യമന്ത്രിയോട് ആവശ്യപ്പെട്ടതായും എംഎല്‍എ പറഞ്ഞു.

ഇയാള്‍ക്ക് മനുഷ്യക്കടത്തുമായി ഏതു രീതിയിലാണ് ബന്ധമുള്ളതെന്ന് വിശദമായി അന്വേഷിച്ചാല്‍ നടി സംഭവത്തില്‍ പൂര്‍ണ വിവരങ്ങള്‍ ലഭ്യമാകും.ഇടക്കാലത്ത് സിനിമയിലെത്തിയ പലരും സിനിമ വിട്ടു പോയിരുന്നു.ഇവരേക്കുറിച്ചും അന്വേഷണം വേണം.സുനിയുടെ വ്യാജ പാസ്‌പോര്‍ട്,യാത്രാ വിവരങ്ങള്‍ എന്നിവ സംബന്ധിച്ചുള്ള സമഗ്രമായ അന്വേഷണവും വേണം.ഈ വിഷയവുമായി ബന്ധപ്പെട്ട് മുഖ്യമന്ത്രിയുടെ നിലപാട് അറിഞ്ഞ ശേഷം കൂടുതല്‍ വിവരങ്ങള്‍ പുറത്തു വിടാമെന്ന് പി ടി അറിയിച്ചു.