ഊണ് വൈകി പി സി ജോര്‍ജ്ജ് കന്റീന്‍ ജീവനക്കാരനെ മര്‍ദ്ദിച്ചു,പിസി യ്ക്കും പി എയ്ക്കുമെതിരെ കേസ്

കുടുംബശ്രീ കന്റീന്‍ നടത്തിപ്പുകാരന്‍ ഊണു കൊണ്ടു വരാന്‍ വൈകിയതിനെ തുടര്‍ന്ന് പൂഞ്ഞാര്‍ എം എല്‍ എയും പി എ സണ്ണിയും ചേര്‍ന്ന് ഇയാളെ മര്‍ദ്ദിച്ചെന്ന പരാതിയില്‍ ഇരുവര്‍ക്കുമെതിരെ കേസെടുത്തു.സംഘം ചേര്‍ന്ന് മര്‍ദ്ദിക്കുക,അസഭ്യം പറയുക എന്നീ കുറ്റങ്ങള്‍ ചുമത്തിയാണ് കേസെടുത്തിട്ടുള്ളത്.എന്നാല്‍ കന്റീന്‍ നടത്തിപ്പിനെതിരെ പി സി സ്പീക്കര്‍ക്ക് പരാതി നല്‍കിയിട്ടുണ്ട്.

പി സി ജോര്‍ജ്ജ് പരാതി നല്‍കിയിട്ടുണ്ടെന്നും എന്നാല്‍ കന്റീന്‍ നടത്തിപ്പുകാരുടെ പരാതി ലഭിച്ചിട്ടില്ലെന്നും സ്പീക്കര്‍ ശ്രീരാമകൃഷ്ണന്‍ പറഞ്ഞു.പി സിയുടെ പരാതിയില്‍ അന്വേഷണം നടത്തി വേണ്ട നടപടിയെടുക്കും ഇന്നലെ ഉച്ചയ്ക്കാണ് സംഭവം.എന്നാല്‍ താന്‍ ആരേയും മര്‍ദ്ദിച്ചിട്ടില്ലെന്നും തനിക്കെതിരെയുള്ള ഗൂഢാലോചനയുടെ ഭാഗമാണ് ഇതെന്നും പി സി ജോര്‍ജ്ജ് പറഞ്ഞു.തല്ലിയെന്നു പറയപ്പെടുന്ന കന്റീന്‍ ജീവനക്കാരന്റെ മൊബൈല്‍ ഫോണ്‍ പരിശോധിക്കണമെന്നും പി സി ആവശ്യപ്പെട്ടു.മര്‍ദ്ദനെ തുടര്‍ന്ന് കണ്ണിനും ചുണ്ടിനും പരിക്കേറ്റ ഇയാള്‍ ചികില്‍സ തേടി.