പള്‍സര്‍ സുനിയുടെ ഒളിവില്‍ കഴിഞ്ഞ കെട്ടിടത്തില്‍ നിന്നും അന്വേഷണ സംഘത്തിന് മൊബൈല്‍ ഫോണ്‍ ലഭിച്ചു,ഇവരുടെ സഹായി ഒളിവില്‍

നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിയും കൂട്ടു പ്രതി വിജീഷും ഒളിവില്‍ കഴിഞ്ഞ കോയമ്പത്തൂരിലെ വീട്ടില്‍ അന്വേഷണ സംഘം തെളിവെടുപ്പ് നടത്തി.ഇവിടെ നിന്ന് ഒരു മൊബൈല്‍ ഫോണും ചാര്‍ജ്ജറും ടാബ് ലറ്റും കണ്ടെത്തിയിട്ടുണ്ട്.എന്നാല്‍ നടിയുടെ അപകീര്‍ത്തികരമായ ദൃശ്യങ്ങള്‍ പകര്‍ത്തിയ ഫോണാണ് ഇതെന്ന് സ്ഥിരീകിരിച്ചിട്ടില്ല.ഫോണും ടാബ് ലറ്റും കൂടുതല്‍ പരിശോധനകള്‍ക്കായി ഫോറന്‍സിക് ലാബിന് കൈമാറിയിട്ടുണ്ട്.

ഇരുവരെയും ഇന്ന് രാവിലെയാണ് തെളിവെടുപ്പിനായി കോയമ്പത്തൂരില്‍ അവര്‍ കഴിഞ്ഞിരുന്ന ചാര്‍ലിയുടെ വീട്ടിലെത്തിച്ചത്.സംഭവത്തില്‍ പ്രതിയായ വിജീഷിന്റെ സുഹൃത്താണ് ചാര്‍ലി.ഇയാള്‍ മുമ്പ് ഇലക്ട്രീഷനായി ജോലി ചെയ്തിരുന്ന കാലത്തേ പരിചയം വെച്ചാണ് ഇരുവരും ഇവിടെ തങ്ങിയത്.കോയമ്പത്തൂരിലെ ശ്രീറാം നഗറില്‍ ചാര്‍ലി വാടകയ്‌ക്കെടുത്ത വീടാണിത്.

സുനിയെയും വിജീഷിനെയും ഒറ്റയ്‌ക്കൊറ്റയ്ക്കാണ് മുറികളിലെത്തിച്ച് തെളിവെടുപ്പ് നടത്തിയത്. ഇവര്‍ രണ്ടു പേരും കോടതിയിലെത്താന്‍ ഉപയോഗിച്ച ബൈക്കിന്റെ ഉടമ സെല്‍വനെ കസ്റ്റഡിയിലെടുത്തിട്ടുണ്ട്.എന്നാല്‍ ബൈക്ക് മോഷ്ടിച്ചതാണെന്നാണ് ഇയാള്‍ പറയുന്നത്.പക്ഷെ സെല്‍വനും ഇരുവരും ഒളിവില്‍ താമസിച്ച കെട്ടിട ഉടമ ചാര്‍ലിയും സുഹൃത്തുക്കളാണെന്നത് സംഭവത്തില്‍ ഇവരുടെ പങ്കില്‍ കൂടുതല്‍ ദുരൂഹത ഉണര്‍ത്തുന്നു.എന്നാല്‍ കൂടുതല്‍ അന്വേഷണത്തിനായി ചാര്‍ലിയെ കസ്റ്റഡിയിലെടുക്കാനായില്ല.ഇയാള്‍ ഒളിവിലാണ്.