ബന്ദിപ്പൂര്‍ വനമേഖലയില്‍ കാട്ടു തീ നിയന്ത്രണാതീതം,വയനാട് വന്യജീവി സങ്കേതവും ആശങ്കയില്‍

കഴിഞ്ഞ മൂന്നാലു ദിവസങ്ങളിലായി ബന്ദിപ്പൂര്‍ വനമേഖലയില്‍ തീ നിയന്ത്രണാതീതമായ പടരുകയാണ്.വയനാട് വന്യജീവീ സങ്കേതത്തിന് രണ്ടു കിലോമീറ്റര്‍ മാത്രം അകലെ കുറിച്യാട് പ്രദേത്തുവരെ വരെ തീ പടര്‍ന്നു കഴിഞ്ഞതായാണ് റിപ്പോര്‍ടുകള്‍.തീ നിയന്ത്രിക്കാന്‍ കഴിഞ്ഞില്ലെങ്കില്‍ വയനാട് വനമേഖലയിലും നാശം വിതയ്ക്കുമെന്ന ആശങ്കയിലാണ് വകുപ്പ് അധികൃതര്‍.

സംസ്ഥാന അതിര്‍ത്തി കടന്ന് തീ പടര്‍ന്നാലുണ്ടാകുന്ന അടിയന്തിര സാഹചര്യം കണക്കിലെടുത്ത് നാലു റേഞ്ചുകളിലെ മുഴുവന്‍ ഉദ്യോഗസ്ഥരും വയനാട് റേഞ്ചില്‍ ക്യാമ്പ് ചെയ്യുന്നുണ്ട്.പ്രദേശവാസികളും ഉദ്യോഗസ്ഥരുമടക്കം മൂന്നുറിലധികം പേരാണ് ക്യാമ്പ് ചെയ്യുന്നത്.അടിക്കാട് ചെത്തിയും കൗണ്ടര്‍ ഫയര്‍ ഒരുക്കിയും തീയെ തടയിടാനുള്ള നീക്കവും ആരംഭിച്ചിട്ടുണ്ട്.

വയനാട് വന്യജീവി സങ്കേതത്തിന് സമീപമുള്ള ഗ്രാമങ്ങളും ഉള്‍പ്രദേശത്തുള്ള ഗോത്രവര്‍ഗ ഗ്രാമങ്ങളും അതീവ ജാഗ്രത പാലിക്കണമെന്ന നിര്‍ദ്ദേശം വനം വകുപ്പ് നല്‍കിയിട്ടുണ്ട്.തീ പടരുന്നതിനാല്‍ വന്യ ജീവികള്‍ കനത്ത ചൂടു മൂലം കാടിനു വെളിയിലേക്ക് കടക്കാനുള്ള സാധ്യതയും കാണുന്നു.കൊടും വരള്‍ച്ചമൂലം ബന്ദിപ്പൂര്‍ വനമേഖല ഇതാദ്യമായാണ് ഇത്തരത്തില്‍ കത്തിയമരുന്നത്.