രാഷ്ട്രീയാനിശ്ചിതാവസ്ഥ തുടരുന്നു,തമിഴ്‌നാട് ആരു ഭരിക്കും?

അനധികൃത സ്വത്തു സമ്പാദനക്കേസില്‍ ശശികലയ്ക്കു ജയില്‍ ശിക്ഷ വിധിച്ചതിനു പിന്നാലെ പനീര്‍ശെല്‍വം പക്ഷവും ശശികല പക്ഷവും സഭയിലെ ബലാബലത്തിനൊരുങ്ങുകയാണ്.ഭൂരിപക്ഷം എംഎല്‍എ മാരുടെ പിന്തുണയുണ്ടെന്നും സര്‍ക്കാരുണ്ടാക്കാന്‍ ക്ഷണിക്കണമെന്നും ആവശ്യപ്പെട്ട് എ ഐ ഡി എം കെയുടെ പുതിയ നിയമസഭാ കക്ഷി നേതാവും ശശികല പക്ഷത്തെ പ്രമുഖനുമായ എടപ്പാടി പഴനിസാമി ഇന്നലെ ഗവര്‍ണറെ കണ്ടിരുന്നു.പക്ഷെ ഗവര്‍ണര്‍ കൃത്യമായ മറുപടി കൊടുത്തിട്ടില്ല.എന്നാല്‍ വിധി വന്നിട്ടും കൂവത്തൂരിലെ റിസോര്‍ടില്‍ എംഎല്‍എ മാര്‍ക്കൊപ്പം തുടരുന്ന ശശികല ഇന്ന് കീഴടങ്ങിയേക്കും എന്ന സൂചനകളുമുണ്ട്.നിയമസഭ വിശ്വാസവോട്ടിലേക്ക് നീങ്ങുയാണെങ്കില്‍ തന്റെ വിശ്വസ്തനായ ആളെ മുഖ്യമന്ത്രിയാക്കുന്നതിനും എംഎല്‍എ മാരുടെ പിന്തുണ ഊട്ടി ഉറപ്പിക്കുന്നതിനുമാകാം ശശികല റിസോര്‍ട്ടില്‍ തുടരുന്നത്.

എന്നാല്‍ ഇന്നലെ വൈകീട്ട് ജയലളിതയുടെ സഹോദര പുത്രി ദീപ ജയകുമാറിനൊപ്പം ഒ പനീര്‍ശെല്‍വം മറീന ബീച്ചില്‍ ജയസ്മാരകം സന്ദര്‍ശിച്ചിരുന്നു.ജനപിന്തുണ ഊട്ടി ഉറപ്പിക്കുന്നതിനാണ് ഒ പി എസ് ശ്രമിക്കുന്നത്.ശശികലയുടെ വിധിയോടെ തമിഴ്‌നാട് രക്ഷപെട്ടന്ന സന്ദേശമാണ് ജനങ്ങള്‍ക്ക് പനീര്‍ശെല്‍വം നല്‍കുന്നത് .കാവല്‍ മുഖ്യമന്ത്രിയായി തുടരുന്ന പനീര്‍ശെല്‍വമായിരിക്കും സഭയില്‍ ഇനി വിശ്വാസ പ്രമേയം അവതരിപ്പിക്കുന്നത്.ഇതില്‍ എങ്ങനെ വിജയിക്കാമെന്നായിരിക്കും ഇപ്പോള്‍ ഇരു പക്ഷത്തേയും ശ്രമം. എന്നാല്‍ ശശികല കീഴടങ്ങിയതിനു ശേഷം മാത്രമേ സര്‍ക്കാരുണ്ടാക്കാനുള്ള നടപടി ക്രമങ്ങളുമായി ഗവര്‍ണര്‍ വിദ്യാസാഗര്‍ റാവു മുന്നോട്ടു പോകാന്‍ സാധ്യതയുള്ളു.