പനീര്‍ശെല്‍വവും ശശികലയും ഗവര്‍ണറെ കണ്ടു,ഇനി എന്ത്?അന്തിമ തീരുമാനം ഗവര്‍ണറുടേത്

നിര്‍ണായക നീക്കങ്ങള്‍ക്കൊടുവില്‍ ഇന്ന് വൈകിട്ട് ഗവര്‍ണര്‍ വിദ്യാസാഗര്‍ റാവുവിനെ സന്ദര്‍ശിച്ച ഒ പനീര്‍ശെല്‍വം രാജി പിന്‍വലിക്കാനുള്ള സന്നദ്ധത അറിയിച്ചു.എന്നാല്‍ ഗവര്‍ണറുടെ ഭാഗത്തു നിന്ന് ഒ പി എസിന് യാതൊരുറപ്പും ലഭിച്ചിട്ടില്ലെന്നാണ് റിപ്പോര്‍ട്ടുകള്‍.ഗവര്‍ണറെ കണ്ടശേഷം മാധ്യമങ്ങളോട് സംസാരിച്ച പനീര്‍ശെല്‍വം ആത്മ വിശ്വാസത്തോടെ പറഞ്ഞത് 'നല്ലതേ നടക്കൂ,നല്ലതേ ജയിക്കൂ', എന്നാണ്. തുടര്‍ന്ന് ഗവര്‍ണറെ സന്ദര്‍ശിച്ച ശശികല 130 എം എല്‍ എ മാരുടെ പിന്തുണക്കത്ത് ഗവര്‍ണര്‍ക്ക് കൈമാറി.എന്നാല്‍ അവര്‍ക്കും ഗവര്‍ണര്‍ യാതൊരുറപ്പും കൊടിത്തിട്ടില്ല.സമയമെടുത്ത് തീരുമാനമെടുക്കാന്‍ ഗവര്‍ണര്‍ക്ക് ഭരണഘടന സ്വാതന്ത്ര്യം നല്‍കുന്നുണ്ട്.നിയമജ്ഞരുമായി ചര്‍ച്ച നടത്തിയ ശേഷമേ ഗവര്‍ണര്‍ തീരുമാനമെടുക്കൂ എന്നാണ് കരുതേണ്ടത്.ശശികല ഉള്‍പ്പെട്ട അഴിമതിക്കേസിന്റെ വിധി സുപ്രീം കോടതി തിങ്കളാഴ്ച പ്രഖ്യാപിക്കുമെന്ന് റിപ്പോര്‍ട്ടുകളുണ്ട്.ആ ദിവസം വരെ തീരുമാനം നീട്ടിക്കൊണ്ടു പോകാനായിരിക്കും വിദ്യാസാഗര്‍ റാവു ശ്രമിക്കുന്നത്.