മനു ശ്രീജയെ മിന്നുകെട്ടി ; “പക്ഷെ ആ കൈകള്‍ക്ക് പറയുവാന്‍ കഥകള്‍ ഏറെയുണ്ട്‌…”

ഇരുകൈപ്പത്തികളും നഷ്ടപ്പെട്ട മനുവിന് അപകടത്തില്‍ മരിച്ച ബിനോയിയുടെ കൈപ്പത്തികളാണ് സഹായകരമായത്. ആ കൈ കൊണ്ടായിരുന്നു മിന്നുകെട്ടല്‍. തിങ്കളാഴ്ച റാന്നി തോട്ടമണ്‍കാവ് ദേവീക്ഷേത്രത്തില്‍ നടന്ന വിവാഹം മറ്റൊരു ഓര്‍മ്മ പുതുക്കല്‍ കൂടിയായിരുന്നു. മനു ശ്രീജയെ മിന്നുകെട്ടുന്നത് ബിനോയിയുടെ അമ്മ ബേബിയും സഹോദരന്മാരും അത് കണ്ടുനിന്നു. കൈപ്പത്തികള്‍ തുന്നിച്ചേര്‍ത്ത ഡോക്ടര്‍ സുബ്രഹ്മണ്യ അയ്യരും വിവാഹത്തിനെത്തി. ഇടക്കുളം വട്ടമലമേലേതില്‍ ശശിധരന്‍പിള്ളയുടെ മകള്‍ ശ്രീജയെയാണ് മനു വിവാഹം കഴിച്ചത്. 2013 ഏപ്രിലില്‍ ട്രെയിന്‍ യാത്രക്കിടയിലുണ്ടായ സംഭവമാണ് തൊടുപുഴ തൊമ്മന്‍കുത്ത് തെങ്ങനാല്‍ വീട്ടില്‍ മനുവിന് ഇരുകൈപ്പത്തികളും നഷ്ടപ്പെടാനിടയാക്കിയത്. 2013 ഏപ്രിലില്‍ മൂകാംബികയിലേക്കുള്ള യാത്രയായിരുന്നു മനുവിന്റെ ജീവിതഗതിയെ മാറ്റി മറിച്ചത്. ജനറല്‍ കംപാര്‍ട്‌മെന്റില്‍ യാത്ര ചെയ്തിരുന്ന മനു കൂടെ യാത്ര ചെയ്ത ദമ്പതികളെ ഹിന്ദി സംസാരിക്കുന്ന നാലു പേര്‍ അസഭ്യം പറയുന്നതു ചോദ്യം ചെയ്തു. ആദ്യം പിന്മാറിയ സംഘം രാത്രി വീണ്ടുമെത്തി മനുവിനെ ആക്രമിച്ചു, ട്രെയിനിന്റെ വാതിലിനു സമീപം നിന്നു യാത്ര ചെയ്തിരുന്ന മനുവിനെ ഇവര്‍ തള്ളിപ്പുറത്തേക്കിട്ടു. തൃശൂര്‍ പൈങ്കുളം റയില്‍വേക്രോസിനു സമീപം വീണുകിടന്ന മനുവിനെ നാട്ടകാരാണു തൃശൂര്‍ മെഡിക്കല്‍ കോളജില്‍ എത്തിച്ചത്. രണ്ടു ദിവസത്തെ അബോധാവസ്ഥയില്‍ നിന്നു ജീവിതത്തിലേക്കു തിരിച്ചെത്തിയപ്പോള്‍ മനു തിരിച്ചറിഞ്ഞു, ഇരു കൈപ്പത്തികളും ഇനി തനിക്കു സ്വന്തമായില്ലെന്ന് തിരിച്ചറിഞ്ഞു. ഒന്നര മാസത്തെ ചികില്‍സയ്ക്കുശേഷം മനു വീണ്ടും തൊമ്മന്‍കുത്തിലെ വീട്ടിലേക്കു തിരിച്ചെത്തി; ജീവിതത്തില്‍ മുറുകെപ്പിടിക്കേണ്ട ഇരു കൈപ്പത്തികളും ഇല്ലാതെ. കൃത്രിമ കൈ വയ്ക്കുന്നത് അടക്കമുള്ള സാധ്യതകള്‍ പരിശോധിച്ചിരുന്നു. ഇതിനിടെ ഒരു ടിവി പരിപാടി വഴിയാണു കൈകള്‍ മാറ്റിവയ്ക്കാന്‍ സാധിക്കുമെന്ന അറിവു മനുവിനു ലഭിക്കുന്നത്. അങ്ങനെ മനു ആ പരിപാടി അവതരിപ്പിച്ച ഡോക്ടറെത്തേടിയെത്തി. കൊച്ചി അമൃത ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സിലെ പ്ലാസ്റ്റിക് ആന്‍ഡ് റീകണ്‍സ്ട്രക്ടീവ് വിഭാഗം മേധാവി ഡോ. കെ.സുബ്രഹ്മണ്യ അയ്യര്‍ മനുവിന് പുതിയ സാധ്യകളിലേക്കുള്ള വഴി തുറന്നുകൊടുത്തു. പരിശോധനകള്‍ പൂര്‍ത്തിയാക്കി കൈപ്പത്തികള്‍ മാറ്റിവയ്ക്കാമെന്നുള്ള തീരുമാനത്തിലേക്കു ഡോ. സുബ്രഹ്മണ്യ അയ്യര്‍ എത്തുകയായിരുന്നു. സര്‍ക്കാരിന്റെ അവയവ ദാനത്തിനുള്ള ഏജന്‍സിസായ കേരള നെറ്റ്‌വര്‍ക്ക് ഓഫ് ഓര്‍ഗന്‍ ഷെയറിങ്ങില്‍ (കെഎന്‍ഒഎസ്) മനുവിന്റെ പേരു രജിസ്റ്റര്‍ ചെയ്തു. ഇതിനിടെയാണു എറണാകുളം വരാപ്പുഴ ചിറയ്ക്കകം ഓളിപ്പറമ്പില്‍ വീട്ടില്‍ ഉത്തമന്റെ മകന്‍ ബിനോയി എന്ന 26കാരന്‍ ബൈക്ക് അപകടത്തില്‍പ്പെട്ട് ഗുരുതരാവസ്ഥയിലാകുന്നത്. ബൈക്കില്‍ പിന്‍സീറ്റില്‍ യാത്രചെയ്യുമ്പോള്‍ റോഡിലേക്കു തെറിച്ചു വീണാണു ബിനോയി അപകടത്തില്‍പ്പെടുന്നത്. മതാപിതാക്കളായ ഉത്തമനും ഭാര്യ ബേബിയും അവയവദാനത്തിനു സമ്മതം നല്‍കുകയായിരുന്നു. കൈകള്‍കൂടി ദാനം ചെയ്യാന്‍ ഇവര്‍ സമ്മതം നല്‍കി. 2015 ജനുവരി 13ന് ബിനോയിയുടെ കൈപ്പത്തികള്‍ മനുവിലേക്കു മാറ്റിവച്ചു. ഡോ. സുബ്രഹ്മണ്യ അയ്യരുടെ നേതൃത്വത്തിലുള്ള 20 അംഗ സംഘം 17 മണിക്കൂര്‍ നീണ്ട ശസ്ത്രക്രിയയ്‌ക്കൊടുവിലാണു കൈപ്പത്തികള്‍ തുന്നിച്ചേര്‍ത്തത്. ഒരു വര്‍ഷത്തോളം എടുത്തു കൈപ്പത്തികള്‍ സാധാരണ ഗതിയില്‍ പ്രവര്‍ത്തിപ്പിച്ചു തുടങ്ങാന്‍. തുടര്‍ന്ന് മനുവിന്റെ ജീവിതത്തിനു പുതിയ വെളിച്ചവുമായി മാതാ അമൃതാനന്ദമയി മഠമെത്തി. ട്രാന്‍സ്പ്ലാന്റ് വിഭാഗത്തില്‍ മനുവിനു ജോലി നല്‍കാന്‍ മഠം തീരുമാനമെടുക്കുകയായിരുന്നു. ട്രാന്‍സ്പ്ലാന്റ് കൗണ്‍സലറായാണു ജോലിക്ക് എടുത്തതെങ്കിലും മെഡിക്കല്‍ ഫൊട്ടോഗ്രഫി അടക്കമുള്ളവയില്‍ മനു സഹായിക്കുന്നുണ്ടെന്നു ഡോ. സുബ്രഹ്മണ്യ അയ്യര്‍ പറയുന്നു. വളരെ ഊര്‍ജസ്വലനായി മനു ജീവിതം മുന്നോട്ടു നയിക്കുന്നതു മറ്റുള്ളവര്‍ക്കു പ്രചോദനമാകുന്നുവെന്നാണ് അദ്ദേഹത്തിന്റെ അഭിപ്രായം. ആശുപത്രി ജോലിയുടെ ഭാഗമായി പുറത്തു പോകുമ്പോള്‍ പലപ്പോഴും ബൈക്കിലാണു യാത്ര. അമൃതയില്‍ നിന്ന് ആദ്യമായി കിട്ടിയ ശമ്പളവുമായി മനു പോയത് ബിനോയിയുടെ വീട്ടിലേക്കാണ്. അമൃത ആശുപത്രിയില്‍ നിന്നാണു മനുവിനു ജീവിത സഖിയെയും ലഭിക്കുന്നത്. കല്യാണം കഴിക്കാന്‍ പോകുന്ന വി. എസ്. ശ്രീജ അമൃതയിലെ നഴ്‌സാണ്. ഏഴു വര്‍ഷമായി അമൃത ആശുപത്രിയില്‍ ജോലി നോക്കുന്ന ശ്രീജ റാന്നി വടശേരിക്കര വട്ടമലമേലേതില്‍ വീട്ടില്‍ ശശിധരന്‍പിള്ളയുടെയും പരേതയായ പ്രസന്ന കുമാരിയുടെയും മകളാണ്.