രണ്ടരലക്ഷം വരെ പിടിവീഴില്ല ; നോട്ട്‌ അസാധുവാക്കലിനു ശേഷമുള്ള നിക്ഷേപങ്ങളെപ്പറ്റി വിശദീകരണവുമായി ആദായനികുതി വകുപ്പ്‌

നോട്ട്‌ അസാധുവാക്കലിനു ശേഷമുള്ള നിക്ഷേപങ്ങളിന്‍മേലുള്ള പരിശോധനയെപ്പറ്റി വിശദീകരണവുമായി ആദായനികുതി വകുപ്പ്‌. രണ്ടര ലക്ഷം രൂപവരെയുള്ള നിക്ഷേപത്തെക്കുറിച്ച്‌ ഒരു പരിശോധനയും ഉണ്ടാകില്ല. നികുതി റിട്ടേണ്‍ വിവരങ്ങളുമായി പൊരുത്തപ്പെടാത്ത അക്കൗണ്ടുകളെക്കുറിച്ചു മാത്രമാകും അന്വേഷണം നടത്തുകയെന്നും സെന്‍ട്രല്‍ ബോര്‍ഡ്‌ ഓഫ്‌ ഡയറക്‌ട്‌ ടാക്‌സസ്‌ (സി.ബി.ഡി.ടി) ചെയര്‍മാന്‍ സുശീല്‍ ചന്ദ്ര പറഞ്ഞു. സി.ഐ.ഐ. സംഘടിപ്പിച്ച ബജറ്റ്‌ സെമിനാറില്‍ സംസാരിക്കുകയായിരുന്നു അദ്ദേഹം. ഉയര്‍ന്ന തുകയുടെ നിക്ഷേപത്തിനും കൃത്യമായ വരുമാനസ്രോതസും നികുതി റിട്ടേണുമുണ്ടെങ്കില്‍ ആശങ്കപ്പെടേണ്ടതില്ല. അതേ സമയം, അഞ്ചു ലക്ഷം രൂപ നിക്ഷേപിച്ചയാള്‍ കഴിഞ്ഞ മൂന്നുവര്‍ഷത്തെ നികുതി റിട്ടേണ്‍ നല്‍കിയിട്ടില്ലെങ്കില്‍ പരിശോധനയുണ്ടാകും. രണ്ടര ലക്ഷം രൂപയുടെ നികുതി റിട്ടേണ്‍ നല്‍കുകയും വിവിധ ബാങ്കുകളിലായി പത്തുലക്ഷം രൂപ നിക്ഷേപിക്കുകയും ചെയ്‌താല്‍ പിടിവീഴും. നികുതി, വരുമാന വിവരങ്ങളും നിക്ഷേപവും തമ്മില്‍ പൊരുത്തമില്ലാതെ വരുന്നിടത്തുമാത്രമേ നടപടിയുണ്ടാകൂ.- സുശീല്‍ ചന്ദ്ര പറഞ്ഞു.