ശശികലയ്ക്കു വഴിയൊരുക്കി ഒ പനീര്‍ശെല്‍വം മുഖ്യമന്ത്രി പദം രാജി വെച്ചു

തമിഴ്‌നാട് മുഖ്യമന്ത്രിയായിരുന്ന ജെ ജയലളിതയുടെ വിയോഗത്തിനു ശേഷം മുഖ്യമന്ത്രി പദം ഏറ്റെടുത്ത ഒ പനീർശെൽവം രാജിവെച്ചു.ഇന്നു ചേർന്ന എ ഐ ഡി എം കെ എം എൽ എ മാരുടെ യോഗത്തിനു ശേഷമാണ് പനീർശെൽവം മുഖ്യമന്ത്രി പദം രാജി വെച്ചതായി അറിയിച്ചത്.ജയലളിതയുടെ വിശ്വസ്തയും തമിഴ്‌നാട്ടിൽ ചിന്നമ്മയെന്നും അറിയപ്പെടുന്ന ശശികലയ്ക്ക് മുഖ്യമന്ത്രി പദം നല്കാനാണ് പനീർശെൽവത്തിന്റെ രാജി.ഈ മാസം ഫെബ്രുവരി 9ന് ശശികല മുഖ്യമന്ത്രിയായി സത്യപ്രതിജ്ഞ ചെയ്യുമെന്നാണ് സൂചന. . ജയലളിതയുടെ മരണം ഔദ്യോഗികമായി പ്രഖ്യാപിക്കുന്നതിനു മണിക്കൂറുകള്‍ മുമ്പാണ് ഒപിഎസ് മുഖ്യമന്ത്രിയായി അധികാരമേറ്റത്. ജയലളിതയുടെ ഉപദേശകയായിരുന്ന മലയാളി ഐഎഎസ് ഉദ്യോഗസ്ഥ ഷീലാ ബാലകൃഷ്ണന്‍ അടക്കം തമിഴ്നാട് സര്‍ക്കാരിലെ മൂന്ന് ഉന്നത ഉദ്യോഗസ്ഥര്‍ വെള്ളിയാഴ്ച രാജിവെച്ചിരുന്നു. ഇത് ശശികലയുടെ സ്ഥാനാരോഹണവുമായാണ് തമിഴ് മാധ്യമങ്ങള്‍ ബന്ധിപ്പിക്കുന്നത്. മുന്‍മന്ത്രിയായിരുന്ന കെഎ സെങ്കോട്ടിയനെയും മുന്‍ മേയര്‍ സൈദായി എസ്. ദുരൈസ്വാമിയെയും പാര്‍ട്ടി ഓര്‍ഗനൈസേഷന്‍ സെക്രട്ടറിമാരായി വെള്ളിയാഴ്ച ശശികല നിയമിച്ചിരുന്നു. യൂത്ത് വിംഗ് സെക്രട്ടറി സ്ഥാനത്തുനിന്ന് വി. അലക്സാണ്ടര്‍ എംഎല്‍എയെ അവര്‍ മാറ്റിയിരുന്നു. പാര്‍ട്ടിക്കുള്ളിലെ തന്റെ അപ്രമാദിത്യം ഉറപ്പിക്കാനാണ് ശശികല ഈ നീക്കങ്ങള്‍ നടത്തിയതെന്നാണ് വിലയിരുത്തല്‍.