സഹകരണ ബാങ്കുകള്‍ക്ക് കണ്ടകശനി തുടരുന്നു,അനധികൃത നിക്ഷേപങ്ങളെക്കുറിച്ചുള്ള അന്വേഷണം ആരംഭിച്ചു

നോട്ടസാധുവാക്കലിനു ശേഷമുണ്ടായ സഹകരണ ബാങ്കുകളുടെ പ്രതിസന്ധി തുടരുന്നു.പാന്‍കാര്‍ഡില്ലാതെ പ്രാഥമിക സഹകരണ ബാങ്കുകളില്‍ നിക്ഷേപിക്കപ്പെട്ടിട്ടുള്ള വന്‍ തുകകളെക്കുറിച്ചുള്ള ആദായനികുതി വകുപ്പിന്റെ അന്വേഷണം ആരംഭിച്ചു.കോഴിക്കോട്ടുള്ള പ്രാഥമിക സര്‍വ്വീസ് സഹകരണ ബാങ്കുകളുടെ നിക്ഷേപത്തെക്കുറിച്ചാണ് ആദ്യഘട്ടത്തില്‍ അന്വേഷണം ആരംഭിച്ചിരിക്കുന്നത്.തുടര്‍ന്ന് മറ്റ് ജില്ലകളിലേക്കും വ്യാപിപ്പിക്കും.മൂന്നുമാസത്തിനകം അന്വേഷണം പൂര്‍ത്തിയാക്കാന്‍ കഴിയുമെന്നാണ് ആദായ നികുതി വകുപ്പ് പ്രതീക്ഷിക്കുന്നത്.നിക്ഷേപകരുടെ വീട്ടുപേര്‌കേന്ദ്രീകരിച്ചാണ് അന്വേഷണം ആരംഭിച്ചിരിക്കുന്നത്.പല പേരുകളില്‍ പല ബാങ്കുകളില്‍ നിക്ഷേപിക്കുന്നു എന്നു ബോധ്യമായതിനെ തുടര്‍ന്നാണ് വീട്ടു പേര് കേന്ദ്രീകരിച്ച് അന്വേഷണം ആരംഭിച്ചിരിക്കുന്നത്.മൊത്ത നിക്ഷേപവും വ്യക്തി നിക്ഷേപവും തുല്യമാണെന്ന് വിവര ശേഖരണത്തില്‍ ഉറപ്പ് വരുത്തുന്നുണ്ട്.റിയല്‍ എസ്റ്റേറ്റില്‍ നിന്നു ലഭ്യമായ തുകയും പെന്‍ഷന്‍ ആനുകൂല്യങ്ങളുമാണ് സഹകരണ ബാങ്കുകളിലെ നിക്ഷേപങ്ങളില്‍ ഏറിയ പങ്കും .പക്ഷെ നിക്ഷേപങ്ങളില്‍ നിന്നു ലഭ്യമാകുന്ന വരുമാനത്തിന് ആദായ നികുതി അടക്കുന്നില്ലെന്ന് പരാതിയുണ്ട്. പൊതുമേഖല ,സ്വകാര്യ ബാങ്കുകളില്‍ പാന്‍കാര്‍ഡ് അടിസ്ഥാനമാക്കിയുള്ള പരിശോധനയും ആദായ നികുതി വകുപ്പ് ആരംഭിച്ചിട്ടുണ്ട്. -