കുടിയേറ്റം നിയന്ത്രിക്കാനുനുള്ള ഉത്തരവില്‍ അമേരിക്കന്‍ പ്രസിഡന്റ് ഡൊണള്‍ഡ് ട്രംപ് ഒപ്പുവെച്ചു ; ഏഴ് മുസ്ലീം രാജ്യങ്ങള്‍ക്ക് അമേരിക്കയില്‍ വിലക്ക്‌

കുടിയേറ്റം നിയന്ത്രിക്കാനും തീവ്ര മുസ്ലീം ചിന്താഗതിക്കാര്‍ രാജ്യത്ത് പ്രവേശിക്കുന്നത് ഒഴിവാക്കാനുള്ള ഉത്തരവില്‍ അമേരിക്കന്‍ പ്രസിഡന്റ് ഡൊണള്‍ഡ് ട്രംപ് ഒപ്പുവെച്ചു. പ്രതിരോധ സെക്രട്ടറിയായി ജനറല്‍ ജെയിംസ് മാറ്റിസ് സത്യപ്രതിജ്ഞ ചെയ്തതിന് തൊട്ടുപിന്നാലെയാണ് ട്രംപ് ഉത്തരവില്‍ ഒപ്പുവെച്ചത്. പുതിയ ഉത്തരവ് പ്രകാരം ഏഴ് മുസ്ലീം രാജ്യങ്ങളില്‍ നിന്നുള്ളവര്‍ക്ക് അമേരിക്കയില്‍ പ്രവേശിക്കുന്നതിന് നിയന്ത്രണമുണ്ടാകും. ഇറാഖ്, സിറിയ, ഇറാന്‍, സുഡാന്‍, ലിബിയ, സൊമാലിയ, യെമന്‍ എന്നീ രാജ്യങ്ങളില്‍ നിന്നുള്ളവര്‍ക്കാണ് നിയന്ത്രണം ഏര്‍പ്പെടുത്തിയിട്ടുള്ളത്. സിറിയയില്‍ നിന്നുള്ള അഭയാര്‍ത്ഥി കുടിയേറ്റത്തിന് മറ്റൊരു ഉത്തരവുണ്ടാകുന്നതുവരെ നിരോധിച്ചതായും വൈറ്റ്ഹൗസ് വ്യക്തമാക്കി. ഭവിയില്‍ കുടിയേറ്റത്തിനായി അപേക്ഷിക്കുന്ന സിറിയക്കാരില്‍ ക്രിസ്ത്യന്‍സിന് മുന്‍ഗണന നല്‍കുമെന്ന് പിന്നീട് ഒരു ടെലിവിഷന്‍ ചാനലിലെ അഭിമുഖത്തില്‍ ട്രംപ് പറഞ്ഞു. അതിനിടെ കുടിയേറ്റ നിയന്ത്രണ ഉത്തരവിനെതിരെ ഡെമോക്രാറ്റ് അംഗങ്ങള്‍ അടക്കം നിരവധി പേര്‍ രംഗത്തുവന്നു. ഉത്തരവ് മുസ്ലീമിനെതിരെയുള്ള നിരോധനമെന്ന് ഡെമോക്രാറ്റ് സെനറ്റര്‍ കമലാ ഹാരിസ് അഭിപ്രായപ്പെട്ടു.