“മൈക്കിള്‍ ജാക്‌സനെ കൊലപ്പെടുത്തിയതാണ്…” ; വെളിപ്പെടുത്തലുമായി മകള്‍ പാരിസ് ജാക്‌സണ്‍

പോപ്പ് ഗായകന്‍ മൈക്കിള്‍ ജാക്‌സനെ കൊലപ്പെടുത്തിയതെന്ന വെളിപ്പെടുത്തലുമായി മകള്‍ പാരിസ് ജാക്‌സണ്‍. ദുരൂഹതകള്‍ ബാക്കിയാക്കി മൈക്കിള്‍ ജാക്‌സണ്‍ മരിച്ച് എട്ട് വര്‍ഷം തികയുമ്പോഴാണ് പിതാവിനെ കുറിച്ചുള്ള വെളിപ്പെടുത്തലുമായി മകള്‍ പ്രത്യക്ഷപ്പെടുന്നത്. തന്റെ പിതാവിന്റെ മരണം കൊലപാതകമാണെന്നാണ് പാരിസ് പറയുന്നത്. റോളിംഗ് സ്‌റ്റോണ്‍ എന്ന മാസികയ്ക്ക് നല്‍കിയ അഭിമുഖത്തിലാണ് പാരിസ് ഇക്കാര്യം വെളിപ്പെടുത്തുന്നത്. പിതാവിന്റെ ഡോക്ടറായിരുന്ന കോണ്‍റാഡ് മറേ മരുന്നുകള്‍ ഓവര്‍ഡോസായണ് നല്‍കിയിരുന്നതെന്നും എന്നാല്‍ കൊലപാതകം നടത്തിയത് ഇദ്ദേഹമല്ലെന്നും മറ്റാരൊക്കെയോ ആസുത്രണം ചെയ്ത് അതി വിദഗ്ധമായാണ് നടപ്പിലാക്കിയതെന്നും പാരിസ് പറഞ്ഞു. പിതാവിനെ പോലെ തനിക്കും കൗമാരപ്രായത്തില്‍ വളരെ മോശമായ അനുഭവങ്ങള്‍ ഉണ്ടായിട്ടുണ്ടെന്നും താന്‍ ലൈംഗികമായി പീഡിപ്പിക്കപ്പെട്ടിട്ടുണ്ടെന്നും പാരിസ് വെളിപ്പെടുത്തി. 14 വയസ്സ് മാത്രമുള്ള തന്നെയാണ് ലൈംഗികമായി ചൂഷണം ചെയ്തതെന്നും അതെന്റെ മാനസികാവസ്ഥയെ പ്രതികൂലമായി ബാധിച്ചുവെന്നും വളരെ നാളത്തെ ചികിത്സയ്ക്ക് ശേഷമാണ് താന്‍ വിഷാഗ രോഗത്തില്‍ നിന്നും മുക്തയായതെന്നും പാരിസ് പറഞ്ഞു. താന്‍ നാലു തവണ ആത്മഹത്യയ്ക്ക് ശ്രമിച്ചിട്ടുണ്ടെന്നും അവസാന ശ്രമം പരാജയപ്പെട്ടപ്പോഴായിരുന്നു മെഡിക്കല്‍ സെന്ററില്‍ ചികിത്സ തേടിയതെന്നും പാരിസ് പറഞ്ഞു. ജീവിതം ആസ്വദിക്കുകയാണ് ഇനി തന്റെ ലക്ഷ്യമെന്നും കൂടുതലായി ഒന്നും പറയാന്‍ ആഗ്രഹിക്കുന്നില്ലെന്നും മോഡല്‍ കൂടിയായ പാരിസ് ജാക്‌സണ്‍ പറയുന്നു. മൈക്കിള്‍ ജാക്‌സണ്‍ തന്റെ ബീറ്റ് ഇറ്റ് എന്ന ഗാനം റെക്കോര്‍ഡ് ചെയ്ത സ്റ്റുഡിയോയിലാണ് പാരിസ് ജാക്‌സണ്‍ ഇപ്പോള്‍ താമസിക്കുന്നത്.