ലക്ഷ്മി നായര്‍ക്കെതിരെ സംസ്ഥാന മനുഷ്യാവകാശ കമ്മീഷന്‍ കേസെടുത്തു

തിരുവനന്തപുരം ലോ അക്കാദമി ലോ കോളെജ് പ്രിന്‍സിപ്പല്‍ ലക്ഷ്മി നായര്‍ക്കെതിരെ സംസ്ഥാന മനുഷ്യാവകാശ കമ്മീഷന്‍ കേസെടുത്തു. ദളിത് വിദ്യാര്‍ത്ഥികളെ ജാതിപ്പേര് പറഞ്ഞ് അധിക്ഷേപിക്കുക, ഇന്റേണല്‍ മാര്‍ക്കിന്റെ പേരില്‍ വിദ്യാര്‍ത്ഥികളെ മാനസികമായി സമ്മര്‍ദ്ദത്തിലാഴ്ത്തുക തുടങ്ങിയ പരാതികളുടെ അടിസ്ഥാനത്തില്‍ സ്വമേധയായാണ് മനുഷ്യാവകാശ കമ്മീഷന്‍ കേസെടുത്തിരിക്കുന്നത്. തൊടുപുഴയില്‍ നടന്ന സിറ്റിങിനിടെ മനുഷ്യാവകാശ കമ്മീഷനംഗം പി മോഹന്‍ദാസാണ് കേസെടുത്തത്. ഇക്കാര്യം അദ്ദേഹം മാധ്യമങ്ങളോട് വ്യക്തമാക്കുകയും ചെയ്തു. രണ്ടാഴ്ചയായി ലോ അക്കാദമിയില്‍ തുടരുന്ന സമരം പരിഹരിക്കാത്തതിന് വിദ്യാഭ്യാസ പൊതു സെക്രട്ടറിക്കെതിരെയും കേസെടുത്തിട്ടുണ്ട്. ലോ അക്കാദമിക്കെതിരെ അഭിഭാഷകരുടേയും രക്ഷിതാക്കളുടേയും വിദ്യാര്‍ത്ഥികളുടേയും ഭാഗത്തു നിന്നും നിരവധി പരാതികളാണ് ലഭിക്കുന്നതെന്ന് മോഹന്‍ദാസ് പറഞ്ഞു. ലോ അക്കാദമിക്കെതിരെ ഉയര്‍ന്നിരിക്കുന്ന ആരോപണങ്ങള്‍ അടിസ്ഥാന രഹിതമാണെന്ന് ചൂണ്ടിക്കാട്ടി ലക്ഷ്മി നായര്‍ കഴിഞ്ഞ ദിവസം രംഗത്തെത്തിയിരുന്നു. കോളെജില്‍ നിയന്ത്രങ്ങള്‍ ഉണ്ടെന്നും ഇത് വിദ്യാഭ്യാസ നിലവാരം ഉയര്‍ത്താനാണെന്നുമായിരുന്നു തിരുവനന്തപുരത്ത് നടത്തിയ വാര്‍ത്താസമ്മേളനത്തില്‍ ലക്ഷ്മി നായര്‍ അഭിപ്രായപ്പെട്ടത്. വാര്‍ത്താസമ്മേളനത്തിനിടെ പ്രതിഷേധ പ്രകടനം നടത്തിയ എബിവിപി പ്രവര്‍ത്തകര്‍ ലക്ഷ്മി നായര്‍ക്ക് നേരെ കരിങ്കൊടി കാണിക്കുകയും ചെയ്തിരുന്നു.