ഫോണിന്റെ ലോക്ക് ചോദിച്ചപ്പോൾ അറിയില്ലെന്ന് മറുപടി; പരിശോധനയിൽ മോഷ്ടിച്ചതെന്ന് കണ്ടെത്തി; അറസ്റ്റ്

കോട്ടയം: മൊബൈൽഫോൺ മോഷണക്കേസിൽ തിരുവനന്തപുരം കവടിയാർ ചില്ലക്കാട്ട് സോമനെ (61) കോട്ടയം വെസ്റ്റ് പോലീസ് അറസ്റ്റ് ചെയ്തു. ഇയാളെ കഴിഞ്ഞദിവസം രാത്രിയിൽ കോട്ടയം കെ.എസ്.ആർ.ടി.സി. ബസ് സ്റ്റാൻഡിൽ സംശയാസ്പദമായരീതിയിൽ കണ്ടിരുന്നു. പോലീസ് ചോദ്യംചെയ്തപ്പോൾ ഇയാളുടെ പക്കൽനിന്ന് സ്മാർട്ട്‌ഫോൺ കണ്ടെത്തി. ഫോണിനെക്കുറിച്ച് ചോദിച്ചപ്പോൾ ഇയാൾക്ക് ഫോണിന്റെ ലോക്ക് പാറ്റേൺ അറിയില്ലെന്ന് പറഞ്ഞു. ഫോൺ പരിശോധിച്ചതിൽനിന്നു തിരുവല്ലയിലുള്ള ആളുടെ ഫോൺ ആണെന്ന് പോലീസ് കണ്ടെത്തി. തുടർന്ന് പോലീസിന്റെ വിശദമായ ചോദ്യംചെയ്യലിൽ പ്രതി തിരുവല്ലയിൽനിന്നു ഫോൺ മോഷ്ടിച്ചതാണെന്ന് പോലീസിനോട് പറയുകയായിരുന്നു. ഇയാൾക്ക് ചങ്ങനാശ്ശേരി, തിരുവല്ല എന്നീ സ്റ്റേഷനുകളിൽ കേസുകൾ നിലവിലുണ്ട്. മൊബൈൽ ഫോൺ മോഷണം പോയതായി ഉടമസ്ഥൻ തിരുവല്ലയിൽ കേസ് രജിസ്റ്റർ ചെയ്തിട്ടുണ്ട്. കോട്ടയം വെസ്റ്റ് സ്റ്റേഷൻ എസ്.എച്ച്.ഒ. അനൂപ് കൃഷ്ണ, എസ്.ഐ. സുരേഷ്, എ.എസ്.ഐ. സി.എസ്. ബിജു, സി.പി.ഒ. ഷൈൻ എന്നിവർ ചേർന്നാണ് പ്രതിയെ അറസ്റ്റു ചെയ്തത്.