കാനഡയിൽ 10 പേരെ കുത്തിക്കൊന്നു, 15 പേർക്ക് പരുക്ക്; ‘ഭീതിപ്പെടുത്തുന്നതും ഹൃദയഭേദകവും’

ഒട്ടാവ ∙ കാന‍ഡയില്‍ രണ്ടു പേർ നടത്തിയ കത്തിക്കുത്ത് ആക്രമണത്തിൽ 10 പേർ കൊല്ലപ്പെട്ടു. ഞായറാഴ്ചയാണ് സസ്ക്വാചാൻ പ്രവിശ്യയിൽ ആക്രമണമുണ്ടായതെന്ന് പൊലീസ് അറിയിച്ചു. 13 ഇടങ്ങളിലായുണ്ടായ ആക്രമണങ്ങളിൽ പതിനഞ്ചോളം പേർക്കാണു പരുക്കേറ്റത്. പരുക്കേറ്റവരെ ആശുപത്രിയിൽ പ്രവേശിപ്പിച്ചതായി റോയൽ കനേ‍ഡിയൻ മൗണ്ടഡ് പൊലീസ് അസിസ്റ്റന്റ് കമ്മിഷനർ റോണ്ട ബ്ലാക്മോർ പറഞ്ഞു. ഡാമിയന്‍ (30), മൈൽസ് സാൻഡേഴ്സൻ (31) എന്നിവരാണ് ആക്രമണം നടത്തിയത്. കറുപ്പ് നിറമുള്ള വാഹനത്തിൽ രക്ഷപ്പെട്ട പ്രതികൾക്കായി പൊലീസ് തിരച്ചിൽ‌ ഊർജിതമാക്കി. ഭീതിപ്പെടുത്തുന്നതും ഹൃദയഭേദകവുമായ അക്രമമാണു നടന്നതെന്ന് കാനഡ പ്രധാനമന്ത്രി ജസ്റ്റിൻ ട്രൂഡോ പ്രതികരിച്ചു. ആക്രമണം നടന്ന ജെയിംസ് സ്മിത്ത് ക്രീ നേഷനിൽ പ്രാദേശിക അടിയന്തരാവസ്ഥ പ്രഖ്യാപിച്ചു. പ്രാദേശിക സമയം പുലർച്ചെ 5.40നാണ് ആക്രമണവിവരം ലഭിക്കുന്നതെന്ന് പൊലീസ് അറിയിച്ചു. പ്രതികൾ ചിലരെ തിരഞ്ഞുപിടിച്ച് ആക്രമിക്കുകയും കണ്ണിൽ കണ്ടവരെയെല്ലാം ലക്ഷ്യമിടുകയും ചെയ്തതായി പൊലീസ് അറിയിച്ചു. മൂന്ന് ഹെലികോപ്റ്ററുകളാണ് പരുക്കേറ്റവരെ ആശുപത്രിയിൽ കൊണ്ടുപോകാനായും മറ്റും വിന്യസിച്ചത്.