ഓണത്തിന് കേരളത്തിലേക്ക് മൂന്ന് പ്രത്യേക തീവണ്ടികള്‍കൂടി

ചെന്നൈ: ഓണക്കാലത്തെ തിരക്ക് പരിഗണിച്ച് കേരളത്തിലേക്ക് മൂന്ന് പ്രത്യേക തീവണ്ടികള്‍കൂടി അനുവദിച്ചു. മൈസൂരുവില്‍നിന്ന് ബെംഗളൂരുവഴി തിരുവനന്തപുരത്തേക്കും യശ്വന്ത്പുരയില്‍നിന്ന് കൊല്ലത്തേക്കും ഹൈദരാബാദില്‍നിന്ന് തിരുവനന്തപുരത്തേക്കുമാണ് പ്രത്യേക സര്‍വീസ്. മൈസൂരു-തിരുവനന്തപുരം വണ്ടി (06201) സെപ്റ്റംബര്‍ ഏഴിന് ഉച്ചയ്ക്ക് 12.15-ന് പുറപ്പെടും. 2.05-ന് കെ.എസ്.ആര്‍. ബെംഗളൂരുവിലും 7.25-ന് സേലത്തും പിറ്റേന്നുരാവിലെ 7.30-ന് തിരുവനന്തപുരത്തും എത്തും. തിരിച്ച് സെപ്റ്റംബര്‍ എട്ടിന് ഉച്ചയ്ക്ക് 12.45-ന് പുറപ്പെട്ട് പിറ്റേന്നുരാവിലെ 11.15-ന് മൈസൂരുവിലെത്തും. യശ്വന്ത്പുര്‍-കൊല്ലം വണ്ടി(06501) സെപ്റ്റംബര്‍ ഏഴിന് ഉച്ചയ്ക്ക് ഒരു മണിക്ക് പുറപ്പെട്ട് പിറ്റേന്ന് പുലര്‍ച്ചെ 4.30-ന് കൊല്ലത്തെത്തും. തിരിച്ച് സെപ്റ്റംബര്‍ എട്ടിന് രാവിലെ 6.10-ന് പുറപ്പെട്ട് രാത്രി 10 മണിക്ക് യശ്വന്ത്പുരിലെത്തും. ഹൈദരാബാദ്-തിരുവനന്തപുരം വണ്ടി (07119)സെപ്റ്റംബര്‍ അഞ്ചിന് വൈകീട്ട് 6.15-ന് ഹൈദരാബാദില്‍നിന്ന് പുറപ്പെട്ട് പിറ്റേന്നുരാത്രി 11.45-ന് തിരുവനന്തപുരത്തെത്തും. തിരിച്ച് സെപ്റ്റംബര്‍ 10-ന് രാത്രി 10 മണിക്ക് പുറപ്പെട്ട് സെപ്റ്റംബര്‍ 12-ന് പുലര്‍ച്ചെ മൂന്നുമണിക്ക് ഹൈദരാബാദിലെത്തും. ഈ വണ്ടികളില്‍ തത്കാല്‍ നിരക്കാണ് ഈടാക്കുക.