തട്ടിപ്പിന് പുതുവഴി, വില്ലേജ് ഓഫീസറുടെ വ്യാജ സീലും ഒപ്പും; വ്യാജ രേഖ നിര്‍മ്മിച്ചവരില്‍ പ്രധാനി പിടിയില്‍

കോഴിക്കോട് : കെ.എസ്.എഫ്.ഇ. യില്‍ നിന്നും ചിട്ടി തുക കൈപ്പറ്റുന്നതിനും, ബാങ്കുകളില്‍ നിന്നും, മറ്റു ധനകാര്യ സ്ഥാപനങ്ങളില്‍ നിന്നും വസ്തു പണയപ്പെടുത്തി ലോണ്‍ എടുക്കുന്നതിനായും വ്യാജ രേഖകള്‍ നിര്‍മ്മിച്ചു നല്‍കുന്ന സംഘത്തിലെ ഒരാള്‍ താമരശ്ശേരി പൊലീസിന്റെ പിടിയില്‍. താമരശ്ശേരി പഴയ ബസ് സ്റ്റാന്റിനു സമീപം വെഴുപ്പൂര്‍ റോഡിലെ ഫ്‌ലാറ്റില്‍ പ്രവര്‍ത്തിച്ചിരുന്ന സ്ഥാപനത്തില്‍ നിന്നുമാണ് വയനാട് സുല്‍ത്താന്‍ ബത്തേരി പട്ടരുപടി, മാട്ടംതൊടുവില്‍, ഹാരിസ് (42) ആണ് താമരശ്ശേരി പോലീസ് അറസ്റ്റു ചെയ്തത്. ഇയാള്‍ കാരന്തൂരിലായിരുന്നു താമസം. വ്യാജരേഖ നിര്‍മ്മാണ സംഘത്തില്‍ ഉള്‍പ്പെട്ട കൂടുതല്‍ പേരെ ഇനിയും പിടി കൂടാനുണ്ട്. ഈങ്ങാപ്പുഴ കെ.എസ്.എഫ്.ഇ. ബ്രാഞ്ചില്‍ മാത്രം ചിട്ടി തുക കൈപറ്റുന്നതിനായി ഇരുപത്തിനാലോളം പേര്‍ വ്യാജ രേഖകള്‍ സമര്‍പ്പിച്ചിരുന്നതായി കണ്ടെത്തിയിരുന്നു. ഇതു സംബന്ധിച്ച് 12 കേസുകള്‍ റജിസ്റ്റര്‍ ചെയ്തിട്ടുണ്ട്, കൂടാതെ കട്ടിപ്പാറ വില്ലേജ് ഓഫീസര്‍ സല്‍കിയ പരാതിയില്‍ രണ്ടു കേസുകളും റജിസ്റ്റര്‍ ചെയ്തിട്ടുണ്ട്. വിവിധ ബാങ്കുകളിലും, ധനകാര്യ സ്ഥാപനങ്ങളിലും വസ്തു പണയ വായ്പക്കായി സമര്‍പ്പിച്ചിട്ടുള്ള രേഖകളും വ്യാജമാണെന്നും കണ്ടെത്തിയിട്ടുണ്ട്. കൈവശവകാശ സര്‍ട്ടിഫിക്കറ്റുക്കളും ലൊക്കേഷന്‍ സ്‌കെച്ചും തയ്യാറാക്കി ഒപ്പും, സീലും വ്യാജമായി പതിപ്പിച്ച് കെ. എസ്. എഫ്. ഇയുടെ വിവിധ ശാഖകളില്‍ നിന്ന് വായ്പ എടുത്തതുമായി ബന്ധപ്പെട്ട് വിവിധ വില്ലേജ് ഓഫീസര്‍മാര്‍ അതാത് പോലീസ് സ്റ്റേഷനുകളില്‍ പരാതി നല്‍കിയിരുന്നു. ബാലുശ്ശേരി, നന്മണ്ട, കാവിലുംപാറ, തിനൂര്‍, കട്ടിപ്പാറ വില്ലേജ് ഓഫീസര്‍മാരാണ് പരാതി നല്‍കിയത്. കെ.എസ്.എഫ്.ഇ മാനേജര്‍മാര്‍ക്ക് സംശയം തോന്നിയ സര്‍ട്ടിഫിക്കറ്റുകളുടെ ആധികാരികത പരിശോധിച്ച് ഉറപ്പ് വരുത്തുന്നതിന് വില്ലേജ് ഓഫീസര്‍മാര്‍ക്ക് റിപ്പോര്‍ട്ട് ചെയ്തിരുന്നു. വില്ലേജ് ഓഫീസര്‍മാരുടെ വിശദമായ പരിശോധനയില്‍ ഇവ വ്യാജമായി നിര്‍മ്മിച്ചതാണെന്ന് കണ്ടെത്തുകയായിരുന്നു. വില്ലേജ് ഓഫീസുകളുടെ സീല്‍ വ്യാജമായി നിര്‍മ്മിച്ചും, വ്യാജ ഒപ്പിട്ടുമാണ് സ്ഥലത്തിന്റെ സ്‌കെച്ച്, ലൊക്കേഷന്‍ സര്‍ട്ടിഫിക്കറ്റും, മറ്റു രേഖകളും നിര്‍മ്മിച്ചത്. എളുപ്പത്തില്‍ ലോണ്‍ ലഭിക്കുന്നതിനായി രേഖകള്‍ ശരിയാക്കി നല്‍കുമെന്ന് വിശ്വസിപ്പിച്ച് ആളുകളില്‍ നിന്നും വന്‍ തുക കൈപ്പറ്റിയാണ് വ്യാജരേഖകള്‍ നിര്‍മ്മിച്ചു നല്‍കുന്നത്. വ്യാജ രേഖ സംബന്ധിച്ച് താമരശേരിയില്‍ മാത്രം 14 കേസുകള്‍ റജിസ്റ്റര്‍ ചെയ്തിട്ടുണ്ട്. കേസുകളുടെ എണ്ണം ഇനിയും കൂടാന്‍ സാധ്യതയുണ്ടെന്ന് പൊലീസ്. തട്ടിപ്പുസംഘത്തെ പിടികൂടുന്നതിനായി റൂറല്‍ എസ്പിയുടെ നിര്‍ദ്ദേശപ്രകാരം പ്രത്യേക സംഘം രൂപീകരിച്ച് അന്വേഷണം നടത്തി വരികയായിരുന്നു.