പിറന്നാളിന് ക്ഷണിക്കാതെയെത്തി, യുവതികളെ ശല്യംചെയ്തു; ചോദ്യംചെയ്തതിന് തള്ളിയിട്ട് കൊന്നു

റായ്പുര്‍: പിറന്നാള്‍ പാര്‍ട്ടിക്കിടെയുണ്ടായ തര്‍ക്കത്തെ തുടര്‍ന്ന് യുവാവിനെ ടെറസില്‍ നിന്ന് താഴേക്ക് തള്ളിയിട്ട് കൊലപ്പെടുത്തി. ഛത്തീസ്ഗഢിലെ ചമ്പ ജില്ലയിലെ ജാഞ്ച്ഗിറിലാണ് 24-കാരനായ കമലേശ്വര്‍ ദേവാംഗന്‍ എന്ന യുവാവ് കൊല്ലപ്പെട്ടത്. കേസില്‍ എട്ട് പ്രതികളെ പോലീസ് അറസ്റ്റ് ചെയ്തു. സുഹൃത്ത് ബിന്നി ദേവാംഗന്റെ പിറന്നാള്‍ ആഘോഷങ്ങളില്‍ പങ്കെടുക്കുകയായിരുന്നു കമേലശ്വര്‍ ഉള്‍പ്പെടെയുള്ളവര്‍. സംഘത്തില്‍ യുവതികളുമുണ്ടായിരുന്നു. ആഘോഷങ്ങളുടെ ഭാഗമായി നൃത്തം ചെയ്യുന്നതിനിടെയാണ് കിരണ്‍ സാരഥി, മനീഷ് സാരഥി എന്നീ യുവാക്കളെ ശ്രദ്ധിക്കുന്നത്. ഇവര്‍ ആരാണെന്ന് സംഘത്തിലുള്ളവര്‍ക്ക് അറിയില്ലായിരുന്നു. ക്ഷണിക്കാതെ എത്തിയ യുവാക്കള്‍ യുവതികളെ ശല്യം ചെയ്യുന്നത് ശ്രദ്ധയില്‍പ്പെട്ടപ്പോഴാണ് കമലേശ്വര്‍ ചോദ്യം ചെയ്തത്. ഇതേത്തുടര്‍ന്ന് തര്‍ക്കവും അടിപിടിയുമുണ്ടായി. ഉടനെ തന്നെ തങ്ങളുടെ മറ്റ് സുഹൃത്തുക്കളെ കിരണും മനീഷും സ്ഥലത്തേക്ക് വിളിച്ചുവരുത്തി. തുടര്‍ന്ന് ആറ് യുവാക്കളാണ് സ്ഥലത്ത് എത്തിയത്. എട്ടംഗ സംഘം പാര്‍ട്ടിയിലെ മറ്റ് യുവാക്കളെ അക്രമിക്കാനും തുടങ്ങി. രക്ഷപ്പെടാനുള്ള ശ്രമത്തിനിടെ കമലേശ്വറിനെ ഇവര്‍ ടെറസില്‍ നിന്ന് താഴേക്കെറിഞ്ഞ് കൊലപ്പെടുത്തുകയായിരുന്നു. ബിലാസ്പുറിലെ ആശുപത്രിയില്‍ എത്തിച്ചെങ്കിലും യുവാവിനെ രക്ഷിക്കാന്‍ കഴിഞ്ഞില്ല. കൊലപാതകക്കുറ്റം ചുമത്തിയാണ് പ്രതികളെ അറസ്റ്റ് ചെയ്തതെന്നും അന്വേഷണം പുരോഗമിക്കുകയാണെന്നും പോലീസ് അറിയിച്ചു.