ഉറങ്ങിക്കിടന്ന യുവതിയുടെ സ്വര്‍ണപ്പാദസരം കവര്‍ന്നയാള്‍ അറസ്റ്റില്‍

കായംകുളം: വീട്ടില്‍ ഉറങ്ങിക്കിടക്കുകയായിരുന്ന യുവതിയുടെ കാലില്‍നിന്നു സ്വര്‍ണപ്പാദസരം മോഷ്ടിച്ച കേസിലെ പ്രതിയെ അറസ്റ്റുചെയ്തു. കരുനാഗപ്പള്ളി പടനായര്‍കുളങ്ങര ബിസ്മില്ല മന്‍സിലില്‍ അന്‍ഷാദാ(44)ണു പിടിയിലായത്. പെരുങ്ങാല കരിമ്പോലില്‍ തറയില്‍വീട്ടില്‍ മയൂരി മുരളീധരന്റെ പാദസരമാണ് 17-ാം തീയതി പുലര്‍ച്ചേ 3.30 ഓടെ മോഷണംപോയത്. ജനാലയുടെ വാതില്‍തുറന്നു കമ്പിയഴികള്‍ക്കിടയില്‍ക്കൂടി കൈകടത്തി പാദസരം വലിച്ചു പൊട്ടിക്കുകയായിരുന്നു. ഒരുപവന്‍ തൂക്കമുള്ളതാണിത്. തുടര്‍ന്നുനടന്ന അന്വേഷണത്തില്‍ അന്‍ഷാദാണ് പാദസരം കവര്‍ന്നതെന്നു പോലീസ് കണ്ടെത്തി. ഇയാള്‍ സ്ഥിരം കുറ്റവാളിയായതിനാല്‍ പോലീസ് കസ്റ്റഡിയിലെടുത്തു ചോദ്യംചെയ്തപ്പോള്‍ എല്ലാവിവരങ്ങളും പറയുകയായിരുന്നു. രണ്ടാംകുറ്റി ഭാഗത്ത് ഇറച്ചിവില്‍പ്പനക്കടയില്‍ അന്‍ഷാദ് ജോലിചെയ്യുന്നുണ്ടായിരുന്നു. കരുനാഗപ്പള്ളി, ഓച്ചിറ, ചവറ പോലീസ് സ്റ്റേഷനുകളില്‍ പിടിച്ചുപറിക്കേസുകളില്‍ അന്‍ഷാദ് പ്രതിയാണ്. ഡിവൈ.എസ്.പി. അലക്‌സ് ബേബി, എസ്.എച്ച്.ഒ. മുഹമ്മദ് ഷാഫി, ശ്രീകുമാര്‍, മുരളീധരന്‍നായര്‍, അന്‍വര്‍, ഫിറോസ്, ഹരികുമാര്‍, മനോജ്, അനീഷ്, ദീപക്, വിഷ്ണു, ശ്രീരാജ്, ഷാജഹാന്‍ എന്നിവരുടെ നേതൃത്വത്തിലാണ് പ്രതിയെ പിടികൂടിയത്.