പാടശേഖരങ്ങളില്‍ രോഗബാധ, ഓലകരിച്ചിലും ചിലന്തി മണ്ഡരിയും, മരുന്നടിച്ചിട്ടും ഫലമില്ലെന്ന് കര്‍ഷകര്‍

പാലക്കാട് : പാലക്കാട് ജില്ലയില്‍ നെല്‍വയലുകളില്‍ ഓല കരിച്ചില്ലും ചിലന്തി മണ്ഡരിയും പടരുന്നു. മരുന്ന് തളിച്ചിട്ടും ഫലിക്കാത്തതിനാല്‍ ആശങ്കയിലാണ് കര്‍ഷകര്‍. മഴമാറി, വെയിലുറച്ചതോടെ പാലക്കാട്ടെ ചില പാടശേഖരങ്ങളില്‍ നെല്‍ച്ചെടികള്‍ക്ക് രോഗബാധ. ഓലകരിയുന്നതാണ് പ്രധാന പ്രശ്‌നം. കതിരിട്ട് തുടങ്ങുന്ന പാടത്ത് ഉള്‍പ്പെടെ ഓല കരിയുന്നുണ്ട്. വെള്ളത്തിലൂടെ പകരുന്ന സാന്തോമൊണാസ് ഒറൈസേയെന്ന ബാക്ടീരിയയാണ് രോഗം പടര്‍ത്തുന്നത്. ചില പ്രദേശങ്ങളില്‍ ചിലന്തി മണ്ഡരിയും വ്യാപിക്കുന്നുണ്ട്. കീടങ്ങളെ നശിപ്പിക്കാന്‍ മരുന്നടിച്ചിട്ടും ഫലമില്ലെന്ന് കര്‍ഷകര്‍ പറയുന്നു. അധ്വാനം മുഴുവന്‍ പാഴായി പോകുമോ എന്ന ആശങ്ക ഉണ്ട് കര്‍ഷകര്‍ക്ക്. കഴിഞ്ഞ വര്‍ഷമാണ് ജില്ലയില്‍ ആദ്യമായി ചിലന്തി മണ്ഡരി റിപ്പോര്‍ട്ട് ചെയ്തത്. രോഗത്തെ പ്രതിരോധിക്കാന്‍ വിദഗ്ധ പഠനം വേണമെന്നാണ് ആവശ്യം