വിവാഹ പക; വധൂവരന്മാര്‍ വന്ന വാഹനം പൊലീസ് സ്റ്റേഷന് മുന്നില്‍ കത്തിച്ചു

തേനിയില്‍ പ്രണയവിവാഹത്തെ തുടര്‍ന്ന് രോഷാകുലനായ പെണ്‍കുട്ടിയുടെ സഹോദരന്‍ വധൂവരന്മാര്‍ വന്ന വാഹനം പൊലീസ് സ്റ്റേഷന് മുന്നില്‍ കത്തിച്ചു. തേനി ജില്ലയിലെ ചിന്നമന്നൂര്‍ സ്റ്റേഷനു മുന്നിലാണ് സംഭവം. പ്രണയ വിവാഹത്തെ തുടര്‍ന്ന് വധൂവരന്മാരും ബന്ധുക്കളുമായി സ്റ്റേഷനില്‍ ചര്‍ച്ച നടക്കുന്നതിനിടെയാണ് യുവതിയുടെ സഹോദരന്‍ വാഹനം പെട്രോള്‍ ഒഴിച്ച് തീയിട്ടത്. ചിന്നമന്നൂര്‍ തേരടി തെരുവില്‍ പാണ്ടിയുടെ മകള്‍ മല്ലികയും(24) മുറച്ചെറുക്കന്‍ ദിനേഷ് കുമാറും ( 28) പ്രണയത്തിലായിരുന്നു. ഇരുവരുടെയും വിവാഹത്തിന് വീട്ടുകാര്‍ എതിരായതോടെ ബന്ധുക്കളില്‍ ചിലരുടെ സഹായത്തോടെ ഇവര്‍ വീരപാണ്ടി ക്ഷേത്രത്തില്‍ വിവാഹിതരായി. ബന്ധുക്കളെത്തി പ്രശ്‌നം ഉണ്ടാക്കാന്‍ സാധ്യതയുള്ളതിനാല്‍ ഇരുവരും വിവാഹശേഷം ചിന്നമന്നൂര്‍ പൊലീസ് സ്റ്റേഷനില്‍ അഭയം തേടി. പൊലീസ് ഇരുവരുടെയും ബന്ധുക്കളെ സ്റ്റേഷനിലേക്ക് വിളിപ്പിച്ച് സംസാരിക്കുന്നതിനിടെയാണ് പുറത്തിറങ്ങിയ മല്ലികയുടെ സഹോദരന്‍ നല്ല പെരുമാള്‍ (26) സ്റ്റേഷനു മുന്നില്‍ നിര്‍ത്തിയിട്ട സ്‌കോര്‍പിയോ കാര്‍ പെട്രോള്‍ ഒഴിച്ച് കത്തിച്ചത്. സ്ഥലം വിട്ട നല്ല പെരുമാളിനെ പിന്നീട് പൊലീസ് അറസ്റ്റ് ചെയ്തു.