മുംബൈയില്‍ കാമുകനെ ഓട്ടോയില്‍ വച്ച് യുവതി കഴുത്തു ഞെരിച്ച് കൊന്നു; അറസ്റ്റില്‍

മുംബൈ വിവാഹ വാഗ്ദാനത്തില്‍ നിന്ന് പിന്‍മാറിയ കാമുകനെ യുവതി ഓട്ടോയില്‍ വച്ച് കഴുത്തു ഞെരിച്ച് കൊന്നു. ഓട്ടോറിക്ഷ ഡ്രൈവറായ റംസാന്‍ ഷെയ്ഖ്(26) എന്ന യുവാവാണ് കൊല്ലപ്പെട്ടത്. മുംബൈ അരേ കോളനിയില്‍ ശനിയാഴ്ചയാണ് മുംബൈയെ നടുക്കിയ കൊലപാതകം അരങ്ങേറിയത്. സംഭവത്തില്‍ കാമുകി സൊഹ്‌റ ഷാ 32 വയസ്സുകാരിയെ പൊലീസ് അറസ്റ്റ് ചെയ്തു. 6 മക്കളുടെ അമ്മയായ സൊഹ്‌റ ആദ്യ ഭര്‍ത്താവില്‍ നിന്ന് 2 വര്‍ഷം മുന്‍പാണ് വിവാഹമോചനം നേടിയത്. ഒരു വര്‍ഷത്തിലേറെയായി റംസാനുമായി പ്രണയത്തിലായിരുന്നു. ഇരുവരും ഒരുമിച്ചായിരുന്നു താമസം. ഇരുവരും പതിവായി വഴക്കിടാറുണ്ടെന്നും തര്‍ക്കങ്ങള്‍ പരിഹരിക്കാന്‍ പൊലീസിനെ സമീപിക്കാനും ഇരുവരും തീരുമാനിച്ചിരുന്നതായും സമീപവാസികള്‍ പറഞ്ഞു. വിവാഹവാഗ്ദാനം നല്‍കി റംസാന്‍ തന്നെ കബളിപ്പിക്കുകയാണെന്നും സോഹ്‌റ നിരന്തരം പരാതിപ്പെട്ടിരുന്നു. ഓട്ടോറിക്ഷ ഓടിക്കുകയായിരുന്ന റംസാനെ പിന്‍സീറ്റിലിരുന്ന സൊഹ്‌റ ദുപ്പട്ട കഴുത്തില്‍ മുറുക്കി കൊല്ലുകയായിരുന്നുവെന്നും പൊലീസ് പറയുന്നു. മരണം ഉറപ്പാക്കിയ ശേഷം യുവതി പൊലീസ് സ്റ്റേഷനിലെത്തി കീഴടങ്ങുകയായിരുന്നു.