ഇന്ത്യന്‍ പാസ്‌പോര്‍ട്ടില്‍ വിദേശത്തേക്ക് കടക്കാന്‍ ശ്രമിച്ച നാല് ബംഗ്ലാദേശി പൗരന്‍മാര്‍ കൊച്ചിയില്‍ പിടിയില്‍

കൊച്ചി: ഇന്ത്യന്‍ പൗരന്മാരെന്ന വ്യാജേന പാസ്‌പോര്‍ട്ട് തരപ്പെടുത്തി വിദേശത്തേക്ക് കടക്കാനെത്തിയ നാല് ബംഗ്ലാദേശികളെ നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ പിടികൂടി. എയര്‍ ഇന്ത്യയുടെ ഷാര്‍ജ വിമാനത്തില്‍ പോകാനെത്തിയ സമീര്‍ റോയ്, റോയ് അരു, റോയ് അനികത് , നിമൈദാസ് എന്നിവരാണ് പിടിയിലായത് .ഇവരില്‍ രണ്ട് പേര്‍ മധ്യപ്രദേശുകാരെന്ന വ്യാജേനയും ഒരാള്‍ ഗുജറാത്ത് സ്വദേശിയെന്ന വ്യാജേനയും മറ്റൊരാള്‍ പശ്ചിമ ബംഗാള്‍ സ്വദേശിയെന്ന വ്യാജേനയുമാണ് പാസ്‌പോര്‍ട്ട് തരപ്പെടുത്തിയത്. ഇവരുടെ പാസ്‌പോര്‍ട്ടില്‍ കൂടുതല്‍ പരിശോധനകള്‍ നടത്തുകയാണെന്ന് നെടുമ്പാശ്ശേരി പൊലീസ് വ്യക്തമാക്കി. പാസ് പോര്‍ട്ട് ഒറിജിനല്‍ ആണെന്നും വ്യാജ വിവരങ്ങള്‍ നല്‍കിയാണ് ഇത് തരപ്പെടുത്തിയത് എന്നുമാണ് കരുതുന്നത്. ബംഗ്ലാദേശില്‍ നിന്നുള്ളവര്‍ക്ക് ഗള്‍ഫിലെ പല ജോലികള്‍ക്കും പരിഗണന ലഭിക്കാറില്ല. ഇതേത്തുടര്‍ന്നാണ് ഇവരെ ഇന്ത്യയിലെത്തിച്ച് ഗള്‍ഫിലേക്ക് എത്തിക്കുന്നത്. യാത്ര ചെയ്യാനെത്തിയ നാല്‍വര്‍ സംഘത്തില്‍ സമീര്‍ റോയ് വ്യാജമേല്‍ വിലാസത്തില്‍ പാസ്‌പോര്‍ട്ട് എടുത്തയാളാണെന്ന സംശയം പാസ്‌പോര്‍ട്ട് ഓഫീസില്‍ നിന്ന് എമിഗ്രേഷനിലേക്ക് അറിയിച്ചിരുന്നു. ഇതേതുടര്‍ന്ന് ഇയാളെ ചോദ്യം ചെയ്തപ്പോഴാണ് മറ്റ് മൂവരും ഇത്തരത്തില്‍ പാസ്‌പോര്‍ട്ട് തരപ്പെടുത്തിയവരാണെന്ന് വെളിപ്പെട്ടത്.