നാദാപുരം സ്വദേശിനിയായ ആര്‍പിഎഫ് ജീവനക്കാരിയെ ട്രെയിനുള്ളില്‍ വെട്ടിപരിക്കേല്‍പ്പിച്ചു

കോഴിക്കോട് : നാദാപുരം സ്വദേശിനിയായ ആര്‍പിഎഫ് ജീവനക്കാരിയെ ട്രെയിനിനുള്ളില്‍ വച്ച് വെട്ടിപരിക്കേല്‍പ്പിച്ചു. നാദാപുരം പുറമേരി സ്വദേശിനി എന്‍ എന്‍ ആശിര്‍വയ്ക്കാണ്(23) പരിക്കേറ്റത്. ചെന്നൈ സബര്‍ബന്‍ ട്രെയിനില്‍ വച്ചാണ് സംഭവം.കത്തി കൊണ്ടുള്ള ആക്രമത്തില്‍ ആശിര്‍വയുടെ കഴുത്തിലും നെഞ്ചിലും ആഴത്തിലുള്ള മുറിവേറ്റുമെന്നാണ് റിപ്പോര്‍ട്ട്. ആശിര്‍വയെ പെരമ്പൂര്‍ റെയില്‍വേ സ്റ്റേഷന്‍ ആശുപത്രിയില്‍ പ്രവേശിപ്പിച്ചു. ചെന്നൈ ബീച്ചില്‍ നിന്ന് വേളച്ചേരിയിലേക്ക് പോകുന്ന സബര്‍ബന്‍ ട്രെയിനില്‍ വച്ചായിരുന്നു സംഭവം. ട്രെയിന്‍ പുറപ്പെടുന്നതിനു മുമ്പ് വനിതാ കോച്ചില്‍ മദ്യലഹരിയിലുള്ള യുവാവ് കയറിയിരുന്നു.ഇയാളോട് ഇറങ്ങിപ്പോവാന്‍ ആവശ്യപ്പെട്ട് വനിതകള്‍ ബഹളം വെച്ചു. എന്നാല്‍ ഇയാള്‍ തയ്യാറായില്ല. ഇവിടെയെത്തിയ ആശിര്‍വ ഇയാളോട് ട്രെയിനില്‍ നിന്നും ഇറങ്ങാന്‍ പറയുകയായിരുന്നു. ഇതിനിടെ കൈവശമുണ്ടായിരുന്ന കത്തിയെടുത്ത് ഇയാള്‍ ആശിര്‍വയെ ആക്രമിച്ചു. ഈ സമയം ട്രെയിനും പുറപ്പെട്ടിരുന്നു. വീണ്ടും ഇയാള്‍ ആക്രമിക്കാന്‍ ഒരുങ്ങിയതോടെ ആശിര്‍വ പ്ലാറ്റ്‌ഫോമിലേക്ക് ചാടി. പിന്നാലെ ഇയാളും ട്രെയിനില്‍ നിന്ന് ചാടി രക്ഷപ്പെടുകയായിരുന്നു.