100 കോടി രൂപ വില!, പുതിയ ഹെലികോപ്ടര്‍ സ്വന്തമാക്കി യൂസഫലി

കൊച്ചി: 100 കോടി രൂപ വിലയുള്ള എയര്‍ബസ് എച്ച് 145 എന്ന ആഡംബര ഹെലികോപ്റ്റര്‍ സ്വന്തമാക്കി മലയാളി വ്യവസായിയായും ലുലു ഗ്രൂപ്പ് ചെയര്‍മാനും മാനേജിംഗ് ഡയറക്ടറുമായ എം എ യൂസഫലി. ആര്‍പി ഗ്രൂപ്പ് ഓഫ് കമ്പനികളുടെ ചെയര്‍മാന്‍ രവി പിള്ളയാണ് ഈ ആഡംബര ഹെലികോപ്റ്റര്‍ സ്വന്തമാക്കുന്ന ആദ്യ ഇന്ത്യക്കാരന്‍. തൊട്ടുപിന്നാലെ യൂസഫലിയും ഹെലികോപ്ടര്‍ സ്വന്തമാക്കി. ഹെലികോപ്റ്റര്‍ ബുധനാഴ്ച കൊച്ചിയില്‍ എത്തി. ഏറ്റവും കൂടുതല്‍ വിറ്റുപോകുന്ന ഹെലികോപ്ടറാണ് എച്ച് 145. ലോകമെമ്പാടും ഏകദേശം 1,500 ഹെലികോപ്റ്ററുകളാണ് ഇതുവരെ വിറ്റുപോയത്. ജര്‍മ്മന്‍ കമ്പനിയുടെ H145 നാല് ടണ്‍ ക്ലാസ് ഇരട്ട-എഞ്ചിന്‍ റോട്ടര്‍ക്രാഫ്റ്റ് ഉല്‍പ്പന്ന ശ്രേണിയിലെ ഏറ്റവും പുതിയ മോഡലാണ്. എന്‍ജിന്‍ ശേഷിയും കാലവസ്ഥക്കനുയോജ്യമായി പ്രവര്‍ത്തിക്കുന്നതുമാണ് പ്രത്യേകത. സിവില്‍, മിലിട്ടറി ദൗത്യങ്ങള്‍ക്ക് ഉപയോ?ഗിക്കാമെന്നതാണ് മറ്റൊരു പ്രത്യേകതയെന്ന് വെബ്‌സൈറ്റില്‍ പറയുന്നു. 2021 ഏപ്രില്‍ 11 ന് കൊച്ചിയിലെ പനങ്ങാട് ചതുപ്പ് നിലത്ത് യൂസഫലിയും ഭാര്യയും സഞ്ചരിച്ച ഹെലികോപ്റ്റര്‍ ക്രാഷ് ലാന്‍ഡ് ചെയ്തിരുന്നു. ഭാഗ്യത്തിനാണ് പരിക്കേല്‍ക്കാതെ ഇരുവരും രക്ഷപ്പെട്ടത്. തുടര്‍ന്നാണ് യൂസഫലി പുതിയ ഹെലികോപ്ടറായ എച്ച് 145 വാങ്ങിയത്. ഇറ്റാലിയന്‍ നിര്‍മാതാക്കളായ അഗസ്റ്റ വെസ്റ്റ്ലാന്‍ഡിന്റെ 109എസ്പിയുടെ ഹെലികോപ്റ്ററും അടുത്തിയെ വിപണിയിലെത്തിയിരുന്നു. രണ്ട് പൈലറ്റുമാരെയും സ്റ്റാന്‍ഡേര്‍ഡ് കോണ്‍ഫിഗറേഷനില്‍ എട്ട് യാത്രക്കാരെയും, ഉയര്‍ന്ന സാന്ദ്രതയുള്ള കോണ്‍ഫിഗറേഷനില്‍ രണ്ട് പൈലറ്റുമാരെയും 10 യാത്രക്കാരെയും ഉള്‍ക്കൊള്ളാന്‍ H145-ന് കഴിയും. എമര്‍ജന്‍സി ഫ്‌ലോട്ടുകള്‍, റെസ്‌ക്യൂ ഹോസ്റ്റ്, സെര്‍ച്ച്‌ലൈറ്റ്, കാര്‍ഗോ ഹുക്ക് എന്നിങ്ങനെ വേഗത്തിലും എളുപ്പത്തിലും പരസ്പരം മാറ്റാവുന്ന ഓപ്ഷണല്‍ ഉപകരണങ്ങളുടെ ലഭ്യത H145-ന് സവിശേഷതയാണ. വൈവിധ്യമാര്‍ന്ന ക്യാബിന്‍ ലേഔട്ടിനൊപ്പം, മള്‍ട്ടി പര്‍പ്പസ് റോട്ടര്‍ക്രാഫ്റ്റ്, സ്വകാര്യ, ബിസിനസ് ഏവിയേഷന്‍, ഓഫ്ഷോര്‍ പ്രവര്‍ത്തനങ്ങള്‍ എന്നിവയുള്‍പ്പെടെയുള്ള കാര്യങ്ങള്‍ക്കും വ്യോമ ഗതാഗതത്തിനും എമര്‍ജന്‍സി മെഡിക്കല്‍ സേവനങ്ങള്‍ക്കും അനുയോജ്യമാണ് ഈ ഹെലികോപ്ടര്‍.