സ്വകാര്യചിത്രം പുറത്തുവിടുമെന്ന് ഭീഷണി; മരിക്കും മുന്‍പ് ടെക്കി യുവതി 15 തവണ കാമുകനെ വിളിച്ചു

ഭുവനേശ്വര്‍: ഒഡീഷയിലെ ഭുവനേശ്വറില്‍ ടെക്കി യുവതി ആത്മഹത്യ ചെയ്ത സംഭവത്തില്‍ യുവതിയുടെ കാമുകനെതിരെ ഗുരുതര ആരോപണവുമായി കുടുംബം. കാമുകന്‍ ഒഴിവാക്കാന്‍ ശ്രമിച്ചതും ഭീഷണിപ്പെടുത്തിയതുമാണ് യുവതി ജീവനൊടുക്കാന്‍ കാരണമെന്നു കുടുംബം പറയുന്നു. ശ്വാസം മുട്ടിയാണ് മരണമെന്നും, യുവതിയുടെ ശരീരത്തില്‍ മറ്റു പാടുകളൊന്നും ഉണ്ടായിരുന്നില്ലെന്നും പോസ്റ്റ്‌മോര്‍ട്ടം റിപ്പോര്‍ട്ടില്‍ വ്യക്തമാക്കിയിരുന്നു. ഒഡീഷയിലെ ഭദ്രക് സ്വദേശി ശ്വേത ഉത്കല്‍ കുമാരി ജീവനൊടുക്കിയ സംഭവത്തില്‍ വിശദമായ അന്വേഷണം നടത്തിവരികയാണെന്നു പൊലീസ് അറിയിച്ചു. കാമുകന്‍ യുവതിയെ ഒഴിവാക്കാന്‍ ശ്രമിച്ചെന്നും സ്വകാര്യ ചിത്രങ്ങള്‍ പുറത്തുവിടുമെന്നു പറഞ്ഞ് ഭീഷണിപ്പെടുത്തിയെന്നും കുടുംബം ആരോപിക്കുന്നു. ജീവനൊടുക്കും മുന്‍പ് 15 തവണ കാമുകനായ സൗമ്യജിത്തിനെ ഫോണില്‍ വിളിച്ചെന്നും എന്നാല്‍ ഇയാള്‍ ഫോണ്‍ എടുക്കാന്‍ തയാറായില്ലെന്നും അന്വേഷണത്തില്‍ കണ്ടെത്തിയിരുന്നു. കഴിഞ്ഞ ശനിയാഴ്ചയാണ് ചന്ദ്രശേഖര്‍പുര്‍ പൊലീസ് സ്റ്റേഷന്‍ പരിധിയിലെ ഫ്‌ലാറ്റില്‍ യുവതിയെ തൂങ്ങിമരിച്ച നിലയില്‍ കണ്ടെത്തിയത്. യുവതിയുടെ ഫോണും ഡയറിയും പരിശോധിച്ചതോടെയാണ് കാമുകനെക്കുറിച്ച് വിവരം ലഭിച്ചത്. ഒപ്പം താമസിച്ചിരുന്നവര്‍ പുറത്തുപോയ സമയത്താണ് യുവതി ജീവനൊടുക്കിയത്. ഓഗസ്റ്റ് 18ന് പബ്ബില്‍ വച്ച് കമിതാക്കള്‍ തമ്മില്‍ വിവാഹക്കാര്യത്തെ കുറിച്ച് തര്‍ക്കമുണ്ടായതായി പൊലീസിനു വിവരം ലഭിച്ചിട്ടുണ്ട്. വിവാഹം നടക്കണമെങ്കില്‍ 30 ലക്ഷം രൂപ സ്ത്രീധനമായി സൗമ്യജിത്തിന്റെ മാതാപിതാക്കള്‍ ആവശ്യപ്പെട്ടതായി ശ്വേതയുടെ രക്ഷിതാക്കള്‍ ആരോപിക്കുന്നു.