യുപിയില്‍ കൂട്ടബലാത്സംഗക്കേസിലെ അതിജീവിതയായ പതിനഞ്ചുകാരി ജീവനൊടുക്കിയ നിലയില്‍

ലക്നൗ ഉത്തര്‍പ്രദേശില്‍ കൂട്ടബലാത്സംഗക്കേസിലെ അതിജീവിതയായ 15 വയസ്സുകാരി ജീവനൊടുക്കിയ നിലയില്‍. പെണ്‍കുട്ടിയെ ബുധനാഴ്ച രാവിലെ വീടിനുള്ളില്‍ തൂങ്ങിയ നിലയില്‍ കണ്ടെത്തുകയായിരുന്നുവെന്ന് പൊലീസ് പറയുന്നു. യുപിയിലെ സംഭാല്‍ ജില്ലയിലാണ് സംഭവം. പൊലീസ് കുറ്റവാളികള്‍ക്കൊപ്പം നിലകൊള്ളുകയാണെന്നും നീതി ലഭിക്കുന്നില്ലെന്നും ആരോപിച്ചാണ് പെണ്‍കുട്ടി ജീവനൊടുക്കിയത്. രണ്ട് മാസങ്ങള്‍ക്കു മുന്‍പ് പെണ്‍കുട്ടിയെ പ്രദേശവാസികളായ നാല് പേര്‍ ചേര്‍ന്നു കൂട്ടബലാത്സംഗത്തിന് ഇരയാക്കിയിരുന്നു. എന്നാല്‍ ഒരു മാസത്തിനു ശേഷം മാത്രമാണു പെണ്‍കുട്ടി സംഭവം അമ്മയോടു പോലും പറയാന്‍ തയാറായത്. പ്രതികളില്‍ ഒരാള്‍ രാത്രി വീട്ടുകാര്‍ ഉറങ്ങിയതിനു ശേഷം വീട്ടില്‍ അതിക്രമിച്ചു കയറി പെണ്‍കുട്ടിയെ കീഴ്‌പ്പെടുത്തുകയും ബന്ദിയാക്കി സമീപത്തുള്ള കാട്ടില്‍ എത്തിച്ച്, മറ്റു മൂന്നു പേര്‍ക്കൊപ്പം ചേര്‍ന്ന് കൂട്ടബലാത്സംഗം ചെയ്യുകയായിരുന്നുവെന്നും പെണ്‍കുട്ടി നല്‍കിയ പരാതിയില്‍ പറയുന്നു. ജൂലൈ 15 നാണ് പെണ്‍കുട്ടിയുടെ അമ്മ പൊലീസില്‍ പരാതി നല്‍കിയത്. എന്നാല്‍ പരാതിയില്‍ പൊലീസ് യാതൊരു നടപടിയും എടുത്തില്ലെന്നും കുറ്റവാളികള്‍ക്കൊപ്പം നിലയുറപ്പിക്കുകയാണു ചെയ്തതെന്നും പെണ്‍കുട്ടിയുടെ അമ്മ പറയുന്നു. കേസ് പിന്‍വലിക്കാന്‍ തങ്ങള്‍ക്കു മേല്‍ പൊലീസ് സമ്മര്‍ദം ചെലുത്തിയെന്നും നിരന്തരം മാനസികമായി പീഡിപ്പിച്ചുവെന്നും പെണ്‍കുട്ടിയുടെ കുടുംബം പറയുന്നു. മുതിര്‍ന്ന പൊലീസ് ഉദ്യോഗസ്ഥരെ കണ്ട് സഹായം തേടിയെങ്കിലും ആരും സഹായിക്കാന്‍ തയാറായില്ലെന്നും പെണ്‍കുട്ടിയുടെ അമ്മ പറയുന്നു. എന്നാല്‍ കേസ് അന്വേഷണം പുരോഗമിക്കുകയാണെന്നും കേസുമായി ബന്ധപ്പെട്ട് വിരേഷ് എന്ന യുവാവിനെ അറസ്റ്റ് ചെയ്തിട്ടുണ്ടെന്നും എസ്പി ചക്രേഷ് മിശ്ര മാധ്യമങ്ങളോട് പറഞ്ഞു. ഒളിവിലുള്ള പ്രതികള്‍ക്കായി അന്വേഷണം ശക്തമാക്കിയതായും അദ്ദേഹം പറഞ്ഞു.