ഹോട്ടലില്‍നിന്ന് പൊറോട്ടയും ഓംലെറ്റും കഴിച്ചു, അസ്വസ്ഥത; യുവാവ് മരിച്ചു

കട്ടപ്പന : പൊറോട്ട കഴിച്ചുകൊണ്ടിരിക്കെ അസ്വസ്ഥത അനുഭവപ്പെട്ട യുവാവിനെ ആശുപത്രിയില്‍ എത്തിച്ചെങ്കിലും മരിച്ചു. പൂപ്പാറ ചൂണ്ടല്‍ സ്വദേശി ബാലാജി(35) ആണ് മരിച്ചത്. 22ന് രാത്രിയില്‍ കട്ടപ്പനയിലായിരുന്നു സംഭവം. തമിഴ്നാട്ടില്‍നിന്ന് പുളിയന്‍മലയിലെ തോട്ടത്തിലേക്കുള്ള വളം കയറ്റിയ ലോറിയിലാണ് ബാലാജിയും ബന്ധുവായ യുവാവും ലോഡ് ഇറക്കാനായി എത്തിയത്. രാത്രിയായിട്ടും വളം ഇറക്കി തീരാത്തതിനാല്‍ കട്ടപ്പനയിലെ ലോഡ്ജില്‍ മുറിയെടുത്ത് താമസിച്ചശേഷം പിറ്റേന്ന് ഇറക്കിയാല്‍ മതിയെന്ന് തോട്ടം ഉടമ നിര്‍ദേശിച്ചു. തുടര്‍ന്ന് മൂവരും കട്ടപ്പനയിലെ ലോഡ്ജില്‍ മുറിയെടുക്കാന്‍ എത്തി. ഇതിനിടെ നഗരത്തിലെ ഒരു ഹോട്ടലില്‍നിന്ന് പൊറോട്ടയും ഓംലെറ്റും വാങ്ങി വാഹനത്തിലിരുന്നു കഴിച്ചു. മദ്യപിച്ചിരുന്ന ബാലാജിക്ക് ഭക്ഷണം കഴിക്കുന്നതിനിടെ അസ്വസ്ഥത അനുഭവപ്പെട്ടു. ഒപ്പമുണ്ടായിരുന്നവര്‍ നഗരത്തിലെ ആശുപത്രിയില്‍ എത്തിച്ചെങ്കിലും മരിച്ചു. പൊറോട്ട തൊണ്ടയില്‍ കുടുങ്ങിയതാകാം മരണകാരണമെന്നാണ് പ്രാഥമിക നിഗമനമെങ്കിലും പോസ്റ്റുമോര്‍ട്ടത്തിനുശേഷമേ ഇത് വ്യക്തമാകൂവെന്നു പൊലീസ് പറഞ്ഞു. ഇടുക്കി മെഡിക്കല്‍ കോളജ് ആശുപത്രിയിലേക്ക് മാറ്റിയ മൃതദേഹം ബുധനാഴ്ച പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കും. ശാന്തിയാണ് ബാലാജിയുടെ ഭാര്യ. മക്കള്‍: അര്‍ജുന്‍, അശ്വിന്‍.