വാട്ട്സ് ആപ്പില്‍ അജ്ഞാതന്റെ സന്ദേശം; റിട്ട.അധ്യാപികയ്ക്ക് 21 ലക്ഷം രൂപ നഷ്ടമായി

അജ്ഞാതന്റെ വാട്ട്സ് ആപ്പ് സന്ദേശത്തില്‍ കുരുങ്ങി റിട്ടയേര്‍ഡ് സ്‌കൂള്‍ അധ്യാപിക. വാട്ട്സ് ആപ്പ് സന്ദേശം ലഭിച്ചതിന് പിന്നാലെ 21 ലക്ഷം രൂപയാണ് അധ്യാപികയ്ക്ക് നഷ്ടമായത്. ആന്ധ്രാ പ്രദേശ് അന്നമയ്യ ജില്ല സ്വദേശിനി വരലക്ഷ്മിയാണ് തട്ടിപ്പിന് ഇരയായിരിക്കുന്നത്. അജ്ഞാതനില്‍ നിന്ന് വാട്ട്സ് ആപ്പ് സന്ദേശം ലഭിച്ചതാണ് തട്ടിപ്പിന്റെ തുടക്കം. സന്ദേശത്തിനൊപ്പം ലഭിച്ച ലിങ്കില്‍ വരലക്ഷ്മി ക്ലിക്ക് ചെയ്തു. പിന്നാലെ സൈബര്‍ ക്രിമിനലുകള്‍ക്ക് വരലക്ഷ്മിയുടെ ഫോണ്‍ ഹാക്ക് ചെയ്യാന്‍ സാധിച്ചു. ആദ്യം 20,000 രൂപ, പിന്നീട് 40,000, 80, 000 എന്നിങ്ങനെ 21 ലക്ഷം രൂപയാണ് മോഷ്ടാക്കള്‍ തട്ടിയെടുത്തത്. പണം നഷ്ടപ്പെട്ടുവെന്ന് ബാങ്ക് സന്ദേശം വന്നപ്പോഴാണ് തട്ടിപ്പിനെ കുറിച്ച് വരലക്ഷ്മി അറിയുന്നത്. വരലക്ഷ്മി സൈബര്‍ പൊലീസില്‍ പരാതിപ്പെടുന്നതോടെയാണ് തട്ടിപ്പ് വിവരം പുറത്തറിയുന്നത്. അടുത്തിടെയാണ് സമാന രീതിയില്‍ സോഫ്റ്റ്വെയര്‍ എഞ്ചിനിയറില്‍ നിന്നും പണം നഷ്ടപ്പെട്ടത്. മാഡാനപള്ളി സ്വദേശിയായ ജ്ഞാനപ്രകാശില്‍ നിന്ന് 12 ലക്ഷം രൂപയാണ് തട്ടിപ്പുകാര്‍ നേടിയത്.