പരസ്യം കണ്ട് ഉറപ്പിച്ചു, മോഷ്ടിച്ച കോഴിയാണെന്ന്; കത്തിമുനയില്‍ നിന്നിരുന്ന കോഴിയെ ഉടമ പോയി രക്ഷിച്ചു

മറയൂര്‍: പൊന്നുപോലെ നോക്കിയതായിരുന്നു ആ പോരുകോഴിയെ. പക്ഷേ, കള്ളന്‍ അതിനെ കട്ടുകൊണ്ടുപോയി. എന്നാല്‍, വാട്‌സാപ്പില്‍ വന്ന പരസ്യം ഉടമയ്ക്ക് സഹായമായി. കത്തിമുനയില്‍ നിന്നിരുന്ന കോഴിയെ ഉടമ പോയി രക്ഷിച്ചു. കാന്തല്ലൂര്‍ പഞ്ചായത്തില്‍ ദെണ്ഡുകൊമ്പ് സ്വദേശി കറുപ്പുസ്വാമിയുടെ, രണ്ടുവയസ്സുള്ള പോരുകോഴിയെയാണ് കള്ളന്‍മാര്‍ വീടിനുപിന്നിലെ കൂട്ടില്‍നിന്ന് കൊണ്ടുപോയത്. കറുപ്പുസ്വാമിയുടെ മകളുടെ ഭര്‍ത്താവ് സെല്‍വിന്റെ നേതൃത്വത്തില്‍ പല സ്ഥലത്തും തിരക്കിയെങ്കിലും കണ്ടെത്താനായില്ല. ഒരാഴ്ചകഴിഞ്ഞ് സെല്‍വിന്റെ സുഹൃത്ത് കാര്‍ത്തിക്കിന്റെ ഫോണില്‍ വാട്സാപ്പ് പരസ്യംവന്നു. പോരുകോഴിയെ വില്കാനുണ്ട്, 3000 രൂപ വില എന്നായിരുന്നു പരസ്യം. കോഴിയുടെ ചിത്രവും കൊടുത്തിരുന്നു. സംശയംതോന്നിയ കാര്‍ത്തിക് സെല്‍വിനുമൊത്ത്, പരസ്യംനല്‍കിയ ആളെ സമീപിച്ചു. ഭാര്യാപിതാവിന്റെ കോഴിയെ തിരിച്ചറിഞ്ഞ സെല്‍വിന്‍ ഉടമയോട് കാര്യംപറഞ്ഞു. കോഴിയെ, മോഷ്ടാവ് മറയൂരിലെ കോഴിക്കടയില്‍ 600 രൂപയ്ക്ക് വിറ്റതായിരുന്നു. കടയുടമ ഇതിനെ 1800 രൂപയ്ക്ക് വിറ്റു. ഇങ്ങനെ വാങ്ങിയ ആളാണ് രണ്ടുദിവസം കഴിഞ്ഞ് വാട്സാപ്പില്‍ പരസ്യംചെയ്തത്. മറയൂര്‍ പോലീസിന്റെ സഹായത്തോടെ കോഴിക്കടയുടമയെ ചോദ്യംചെയ്തപ്പോള്‍ 600 രൂപയ്ക്കാണ്, പരിചയമില്ലാത്ത ഒരാളില്‍നിന്ന് ഇതിനെ വാങ്ങിയതെന്ന് വെളിപ്പെടുത്തി. തുടര്‍ന്ന്, കോഴിയെ യഥാര്‍ഥ ഉടമയ്ക്ക് കൈമാറി. കോഴിയെ കടയുടമ ചെറിയ കൂട്ടില്‍ അടച്ചതിനാല്‍ രണ്ടുചിറകുകള്‍ക്ക് പരിക്കേറ്റിട്ടുണ്ട്.